من وحي العقار

[طلال المجلس]

شاعرنا عبدالعزيز العلي العمرو بعد تقاعده من العمل الحكومي حاول ان يجرب حظه في العمل الخاص فافتتح مكتبا عقاريا صغيرا فرأى من خلاله مالم ير من قبل ..
هذه قصيدة كتبها شاعرنا ابو علي عن تجربته في المكتب العقاري و قد اسماها ( من وحي العقار ) ..

من وحي العقار

مالي على من لا يقدر جلاده =لا تامن العقرب و لا تامن الداب
اللي يخطرفلك يبيك برماده =تطيح ما سمّيت ناويك ما هاب
خذ وارده و اللي يعاديك عاده =مادام ما يكتب بالاسطر له اسباب
للصلف طق الارض و الشره هاده =و اقطع حبال الوصل الى الطيب ما ثاب
هالباب ما قدت عليه السداده =حتى نقول الريح ما جت مع الباب
و المسألة تعسرت بالولاده =و اللي بالأول عضه الداب ما تاب
يابو وليد النكث مهيب عاده =يفتل حزام الى تحزمت به عاب
النكث لا يغويك طول امتداده =متماسك تكرم مع الطين و تراب
الى لقيت ابو مبارك فناده =قله ترى المعنى قبل لا يكتمل شاب
عليه حق و لا طلبنا رفاده =و اسلم و لا تشره على عوج الاذناب
ترا الردي يشبه عبسه السماده =حتى الدبش ما تقبله بين الانياب
و البيض قشره ما يبين فساده =مثل الذي عيبه تغطيه الاسلاب
حلت ورا العاطل عصاه و عتاده =مادام لا ضرس فقيده و لا ناب
وانحش عن اللي يدّعون العباده =الحنشل اللي جوك بثياب الاصحاب
اثر زبونك لا سقى الله بلاده =ما يعتق الهرجه و للحق نهاب
و انا عميلي مثل طوق الجراده =بالحلق ينشب لا بلعته و لا ذاب
و الى انبلع عقب التعب و النكاده =ابحل بتطليعه الى اقبل على الباب
اخطيت ما ميّزت حشو الوساده =احسب حشوه طرف لا تبن و اعشاب
من يوم ابو جره تولى القياده =عرفت مالي مع هل الصنف مضراب
حظي مثل صوف نشب في كتاده =متحلكم و الشوك به تقل كلاب
ياهل العقار السعي صعب سداده =ما يعتبر حق مثل بعض الاتعاب
اشوف كل من ختل صيدٍ صاده =و انا رصاصي طايش ما بعد صاب
يامن يشاركني و انا اجمع حصاده =نكذب على كل الجماعة و الاجناب
الشغل مثل القنص يبي الركاده =بالغش نبدا بالبنيخي و الاحباب
انا علي الحلف و هو الشهاده =نكوي مع العلبا الطريده بمشهاب
نقول ضلع طويق مثل الحماده =متواسية مابه تضاريس وشعاب

[روح التميمي]

قصيدة جميلة لشاعرنا الجميل عبدالعزيز العمرو ..

وقد سجلت بكل دقة ووضوح أحوال كثير من الناس

(قله ترى المعنى قبل لا يكتمل شاب) أظن أن كلمة (لا) هنا زائدة

شكرا لك أخي الكريم طلال المجلس , وأنا ممتن لتسجيلك هنا

لتعريفنا بالشاعر , وإطلاعنا على نماذج جميلة من شعره السلس

وشكرا للشاعر المبدع الأستاذ عبدالعزيز العلي العمرو ..

تقبل تحياتي وامتناني