جريت عشرين تتالى وصبيت = صوت يحطم القلب من عبرة لي
حطم الهشيم اللي على منبته ميت = لا هزته ريح الهبايب يهلي
حرق تشيله هوج الارباح وبهيت = من كثر ما شاف الهوايل مولي
غدى مزار للهوى مشته بيت = ويخجها عرض ويظهر معلي
ومخرقه مع كل وجه مصاليت = ما يستعمل الباب غلق وخلي
يا تل قلبي تل عزرٍ بتميت = تل الغصون اللي ورقها مظلي
من يد غشيم جاه في حيل عفريت = ولا طشيره بالخضير يقلي
غديت مقضاه الهوى واستدليت = لا هوب عاذرني ولا سامح لي
غصب علي انقادله ما تبريت = كله على شان الحبيب المسلي
اللي ينبت حبة القلب تنبيت = باقصى الضماير رقعة صابغ لي
سيد البنات اللي يشيع له الصيت = ايضا وانا من ضمنهن سيد لي
يا قصر وين اللي بك العام مريت = وين الحبيب اللي هروجه شفاً لي
بالله وين اللي لجابك وذريت = سهل الجناب معذبن ما فطن لي
وانا على خبرك من العام ما جيت = لا عاد يوم ذكرن عشقت لي
يا قصر من كل التوافيق خليت = مخل جوانبك الونس عقب خلي
وش فايدة من عنوتي يوم رديت = اروح في عزي واعوذ بذلي
مسموح يا حظ الندم لو تزريت = شفتن على نار الهوى حايل لي
تحدني لما وقعت وتبريت = وانا احسب انك ناصحٍ حافظٍ لي
ليت الحبيب يشوف حالي وياليت = انه يزورن ساعة مصخرٍ لي
حيثي طبع قلبي على الحب وبليت = واتلفت روحي والمصايب قضن لي
ماظن تبرا خطوتي لو تداويت = واللي يعرف يعالجن ما حصل لي
واشٍ جرا لي عقب ما شفت واشفيت = مرض الحبيب اللي ثمانه دواً لي
لو ينعش رايع شفاياه مزيت = هو ما نقص عمره وانا جايزلي
يا بو محمد طار عقلي وفزيت = اشكي عليك الحال يا مسندٍ لي
يابن السناني شفت واشرفت و اوحيت = لا تذخر المجهود عن غاية لي
لا شك ما يكتب على العبد تثبيت = يالعين هاتي من دموعك وهلي
طعمي ومشروبي على الكبد حلتيت = مع مرها ومرورها معقد لي
عز الله اني ما بريت وتشافيت = بالنقص يوم ان المصايب تحلي
وصلوا على المعصوم ما طاف بالبيت = وعداد ما حب الحجر من مصلي
العرض العادي
