قصيده يسندها سليمان على الشاعر / عبدالعزيز الفايز
ارى جرح الهوى ماهوب ياوي = ولا يبريه بالطب المداوي
يكفيك الخبر مجنون ليلى = على ما جاه من كبر البلاوي
جريح الود ما يبرى صوابه = طبيبه داه من ياسه رجاوي
ولا له حاجة تلهيه دونه = يهيم مع العرب كنه فداوي
عليل القلب والظاهر صحيح = ولكنه نشاش العود ذاوي
ومن فكره وما ورّاه عقله = يخيّل له ولو انه جلاوي
تبكّيه المضره والصدود = ويفرحه التحري والمناوي
ومن عزمه ومن قوات باسه = يهوم الدرب لو ماهوب قاوي
يمسي همّته في كل ديره = وصبح فاتر الزندين ثاوي
هواه من الهوى جرح هوى به = وعلى ما به يسمونه هواوي
يشيل من الهوى حمل ثقيل = كليف لا زمال ولا عراوي
ولا يوم يزلّ الا بنقصه = كما نقص القمر عقب التساوي
فلكن الدهر غيّر وبدّل = وصار المشلح البدري حساوي
وانا ويّا زماني وامتحاني = جهاد مثل ما قال المعاوي
اهين النفس عما تستهينه = اخاف الهون يوردها مهاوي
ولا ارضا بالجفا واصبر عليه = ولو هو من ولد عم دناوي
اشوم ونادر الماكر يشوم = ولو يصبح عن المربا جلاوي
واجازي راعي المعروف مثله = وازيد اله الجزا عند الهداوي
والازم صاحب اللب اللبيب = والاوي مثلما انه ملاوي
ولو من ورا عين الدقيق = فانا عنده قريب بالحراوي
ولا ارخص عشرته لابني وابوي = على ما قال فجحان الفراوي
الى حاش الفتى حظ يناله = هو اطرى ما يكون من الحلاوي
مضى هذا وقرّبت الدواة = ونسجت ابيات بر للشهاوي
تداوره الرجال مع المجال = كما تندار كاسات القهاوي
للعارف ولارباب العقول = وعلى الجاهل تضيع ابها الهقاوي
سلام من رفيق الى رفيق = الى باروا مضيّعت العزاوي
على صفح من الكاغد لبيب = كما العنبر ينوج من المطاوي
على من يستحق الرسم مني = ولو انه على قربي جفاوي
ولا ينقص عن الف ولا يزيدد = ختمت القيل والفرقا بلاوي
على ما قلت باول ما بديت = ارى جرح الهوى ماهوب ياوي
العرض العادي
