رائعة ابن دويرج مرسله لابنه شعيل بمكه

[ماجدونا]

هفا وزني الوافي وبانت عذاريبي = بعد ضاع شوف العين ضاعت مواجيبي
وانا حافظ نفسي عن الكبر والريا = عن الصاحب الحاضر ومن كان يوحي بي
واشوف الصديق اللي من اول يودني = امرّه وينظرني ولا تقل يدري بي
واسلم عليه وجايزي منه صـدّه = اسف كيف ابغلي واحد ما يغالي بي
تغيـّر الدنيا واهلها تغيروا = اوادم ظواهرها على باطن الذيبي
ملاّقة بالوجه عـقّارة القفا = مواشير شطرات بقصّ العراقيبي
مضى ما ذكرت وقربوا لي قلايص = زمانين ترعى طايلات النبانيبي
مخايير هجن مثل الاقواس كنـّس = مراميل ما لدّن على حنـّة الصيبي
ارفاع المحاصر والمقاديم وردّ = شخص النواظر مثل جمر المشاهيبي
عرا غير امانيّه ونطع وجاعد = وخرج زهى لملطـّفات المصاليبي
عليهن مطاليق يقدّون روسهن = دلايل متى ما اغلنطس الليل غربيبي
الى بان نور الشمس ياركب فاركبوا = من الديرة الفيحا ابلاد المشاعيبي
الى ما برزتوا طالين ثنيـّه = عليهن مهلٍ لين ابقـّش مكاتيبي
ثم المسوهن بالعراقيب والعصي = وعليهن سجوا ياهل الكنـّس الشيبي
الى بندر الحجاج ياركب وجـّهوا = ولا فـّي اكلـّف خاطري بالتحاسيبي
انتم نشامى والمناجيب اصايل = بالابطح لهن في يوم رابع معازيبي
تنشّدوا عن بيت مشعل وخاله = ولد عمي الغالي حصان الاطاليبي
وابنه دويرج والبناخي رحيمنا = خواله وهو منا ولد بندر الطيبي
الى لفيتوهم على خير نوّخوا = وردوا لهم مني سلامي وترحيبي
سلام كما نقع الروايح الى صفا = في ظل قيفٍ خلـّفته النحاحيبي
والذّ واحلى من لبن شمـّخ الذرا = واحلى من الكوثر عذي المششاريبي
وقولوا تراني عقبهم ضايع الجدا = الى زلّ هود الليل دكّـت هناديبي
اسومل كما البربوت لا ذي ولا الذي = كما اللي يدوّر بالمفالي مذاهيبي
وذي حلة المعسر الى قلّ ماله = جفاه القريب ورخص عند الاصاحيبي
ولا فـّي ابين خافي العلم للملا = اشاره وتكفيكم وانا مثل تكفي بي
اقوله بعد ما شفت حالي تركركت = هفا وزني الوافي وبانت عذاريبي
بعد ما انتهى ما قلت صلوا وسلموا = عدد ما همل وبل السحاب الملاجيبي
على المصطفى والآل والصحب كلما = عوى الذيب في عالي طويل المراقيبي