الشاعر علي القري رحمه الله

[ابوسحر]

هو الشاعر علي ابراهيم بن عيد القري ولد بمدينه عنيزه عام 1338هــ .توفيى والده وهو صغير السن

تعلم الشاعر مبادئ القران الكريم والكتابه في مدينه عنيزه . ثم انتق الى مكه المكرمه حيث دخل مدرسه الدفاع

وتخرج منها برتبه ظابط .توفي الشاعر عام 1415هــ في جده.


وقفه مع الشاعر :

عندما قام المسيميري بجمع قصائد الشاعر عبدالله الحرير رحمه الله . وجد الابيات التاليه في كراسه

للشيخ سليمان بن عقيل تحت عنوان لغز إزريجان الموجهه للحرير ويليها ردالحريرعلى إزريجان


يقول إزريجان :

يامل قلب تلوع في هوى جيم وصاد =الى حذفت الثمان اللي بطاريفها
عيني على كثر ماشافت بياض وسواد=ماشفت مثله ولاكثرة عجاريفها
حتيش لو إنها مشهوره بالعناد=ذبح العشاشيق هو عيده وهو ريفها

الى آخر الابيات واليكم اعزائي رد الحرير

البارح القلب له بين الضلوع إجتلاد=مشقي القلب في نفس وتكليفها
تذر بياض وسواد وعندي إشهود وكاد=الود حذفه إبساعه ما ينومن حيفها

الى آخر القصيده .



عندما طبع الديوان اتصل الشاعر علي القري على المسميري وقال أن الأبيات السابقه

التي نسبتها للزراج ليست للزراج

وإنما هي لي وقد أعطيتها للزراج عام 1358هــ وأنا في جدة وقلت له أعطها للحرير ليرد عليها ولم أراها

ولم أسمعها إلا في ديوان الحرير باسم الزراج . فقلت بأني أخذتها من دفتر ابن عقيل لكنه لم يقتنع وبعد اسبوع

أرسل القري هذه الابيات واللتي يشتكي بها على امير الرس ابن عساف


كما ارسل القصيده بدون اي سلام أو تحية


يقول القري :

ياولد عساف ياقرم المناعيري=ياصلك خطي وفيه اسمي وعنواني
ذالي شهر في ورود وفي مصاديري=أصيح ماجاب حلقي جابه إلساني
أبيك تشهد على ولد المسيميري =وسم غنمنا وسيمة واحد ثاني
وذا خطأ ما أقبله لانا ولا غيري=يِزّعل ولو كان هون من بين الأخواني
هو مادراي إن البلد به شيخ وميري=الحق يؤخذ من إفلان وفلانتاني
المملكة من نشت من خير إلى خيري=إلا من فيها ضرب خيمة وصيواني
القصد أنا ماعرف كيري ولا ميري=بينت دعواي عندك وأنت حقاني
وإختامها لك ولهل الحزم تقديري=اللي لهم يشهد التاريخ ظفراني
يوم العدو جاء بقوات وطوابيري=وقفوا بوجهه ولد وسنان وعناني
بين دعواي عندك دون تزويري =أنشد وتلقى الحقيقة ياكحيلاني

فرد الشاعر المسيميري على القري رحمه الله بقوله :

وراك زعلان ياريف المساييري=يامكرم الضيف والجيران والعاني
ماهيب محتاجه حرب ومغاويري=تنخى ابن عساف والقاصي مع الداني
إن كان لك حق أبشر دون تقصيري=من يمنا مايجيك الكيل نقصاني
وإن كان لك ذاهبه فحف المداويري=ترى المفرط إيعرف الناس خسراني
وظن عندك خبر باب المخاسيري=الطارفه من نصيب الذيب سرحاني
ولو وسمكم فوقها شهرت تشهيري=مير الغنم وسّمه قبلي إزريجاني
إن كان لك شرهة فهي على غيري=ياعلي ماهوب حق منك تدهاني
عندي خبر بالورود وبالمصاديري=أسمع بأذاني وقص الدرب بعياني
محدرت دلو وهو ماله محاديري=ولا جبت علم وهو ماهوب وكداني
وإن كان مارضاك يالصاحب معاذيري=الأصل والفصل في دفتر إسليماني

**الأصل والفصل في دفتر إسليماني **
المقصود بــ سليماني هو سليمان بن عقيل



وبعد وصول الرد الى الشاعر القري رحمة الله اتصل على المسيميري وصارت بينهم معرفه

وأقسم القري بأن الأبيات له وليست للزراج









رحم الله الشاعر علي القري وأسكنه فسيح جنته
















محبكم
ابوسحر




ًً

[حترش]

مشكور يابو سحر ماشالله .. والله انك مانت بسهل ... على هالمجهود .. الله يعطيك العافيه
لاتصير ( عبد الله بن خميس ) وحنا ماندري .. ياخوي عطنا من هالسوالف وكثر لنا ..
ونوع .. ترى التنويع زين .. لاتحصر مجهودك بشعراء منطقه وحده .. الله يحفضك ..

[ريان]

الف شكر لك يابو سحر على مجهودك ,,,,,

[ابوسحر]

اشكر لكم مروركم وتعليقكم

عزيزي حترش انتظر وسترى مايسرك بإذن الله

لكن الوقت شوي ضيق في الوقت الحالي






محبكم
ابوسحر

[ماجدونا]

ابــــو ســحــــــر

تسلم والله على المعلومات القيمه عن الشاعر / علي القري .. الله يرحمه ويغفر له . والله هو صادق !! .. يا شين اذا أوخذ قشك وعيونك طايره .

وهذي قصيده للشاعر / القري قالها عندما كان بعيد عن عنيزة :-

على عنيـزة صابني تقل وسـواس 000 ما غير أهذري به ولا بيدي حيله
دار لها بقلوبنا مثــــــل الاجــراس 000 تـــــدق مع رقي النفس وتحويله
دار نحبـــــه حـب بريـام واحساس 000 وحب الوطــن يرجح بحب القبيله
دار بنت مجـده بساس على ساس 000 بجهود أهلها كل جيـــــل بجيله
لما غـدت بالمنطقــــــه تقل نبراس 000 كل يـــــدور لــــــه عليها وسيله
والحمـد للي بلغن مسقط الـــــراس 000 وانــا على حـــال من الله جميله
من عقب تك الخلق من قل الاوناس 000 اليـــــــــوم كني بالف ليله وليله

والقصيده أطول من كذا .. لكن نوعدكم بها كامله بالقريب العاجل .

كل الشكر والتقدير للجميع ..

تحيااااتي

[عطاشا]

الف شكر لك يابو سحر على مجهودك ,,,,,والله يعطيك العافية

[أبو عبدالله 100]

مشكور يابوسحر الله يعطيك ألف عافية على المجهود وروائع التي تتحفنا بها .

[ابوسحر]

اشكر لكم مروركم وتعليقكم




محبكم
ابوسحر

[YsOrI]

الله يعطيك العافيه يابو سحر على هالسيره الكامله للشاعر المعروف ...

الله يعافيك على هالمجهود الطيب

[ابوجريس]

الف شكر لك يا ابو سحر يا شاعرنا