الشاعر الضرغام

[ماجدونا]

هلا يا مرحبا حييت يا ذا الشاعر الضرغام = تحية من صميم القلب والكم يفتح ابوابه
مضى شهر رمضان اللي به العالم صيام قيام = عسى عيده سعيد وكل قحطاني يتهنا به
كثر خيرك على مدحي كما انك من سلال اكرام = عسى ربي يوفقك وتوافق ساعة اجابه
انا يا عبدالهادي احفيت المطايا شرق وشام = اقلب حظي اللي جعل مولاي يتمعنا به
كثير الناس يا راع الوفا للمال كالخدام = والى منك نخيته قام كنه يلعب الطابه
انا بانشدك عن شيٍ بذا الدنيا كما المرسام = يا ويل اللي يجي صوبه تشب النار بثيابه
بعد هذا نعزمك للقصيم بديرة الحكام = عنيزة للمراجل والوناسه دقت اطنابه
تبي تلقى رجال تفتخر في عرفهم قدام = يحبون الغريب وفيهم لبعض العرب ثابه
بعد طاح المطر والوسم وسم زانت الايام = اوريك النفود اللي حلال القوم ترعا به
واذوقكم حليب البل والا من حليب اغنام = مكاشيت العرب يابو سعد كلٍ تذرا به
والى اشتد البراد نشب نارٍ تجلي الاعسام = على شانك وشرواك الغضا له ناس حطابه
يقيمون الشتا فالبر كله للربيع خيام = وبالصيف المزارع منوتك باللي تمنا به
مزارعنا نخل بانواعه ورمان وفيها انعام = كثيره من جليل الملك نشكر خير حنا به
ترا هذي عنيزة يا رفيقي عذبة الانسام = رجال العلم فيها من قديم وراجع كتابه
عسى ربي ياهب الريح يضفي نعمة الاسلام = على كل البلاد ويحفظ ابن سعود زانسابه
واختّمها بذكر الله عليكم والسلام ختام = تحية من صميم القلب والكم يفتح ابوابه