قلب المولع مثل قلب الرضيعي
أهلا هلا باللي عليه الحيـا ضـاع=وإلى نهيت القلـب عيـا يطيعـي
الصاحب اللي كل ما جيت مطـواع=في شوفه احلى من مراعي الربيعي
وإلا على غيري قطـوعٍ وطمّـاع=ما يبدي الهرجة وراسـه رفيعـي
ياما صفا لي والعشاشيـق جِـزّاع=متولّـعٍ قلبـه عليـنـا يريـعـي
وياما هنف لي والمقاديـم نسّـاع=وياما ضحك بحجيّـجٍ لـه لميعـي
من خاطرٍ سمحٍ ولاهـوب جـزّاع=وإلى سمح لي كاسبٍ بي صنيعـي
ياما عليه القلـب يالـه وينـلاع=قبل الفلك ينـدار عجـلٍ سريعـي
واللي يعـلّ القلـب رده إلـى راع=وإن طوّل الغيبه فقلبـي يضيعـي
من علةٍ ما تنشكي مثل الأوجـاع=ولا ودّنا للنـاس فعلـه يشيعـي
ياما لوينا به من القيـل مصـراع=ومن لامني يرمى بنار الصريعـي
لو حال دونه حفرةٍ خمسة أبـواع=قلب المولّع مثل قلـب الرضيعـي
وداورت أنا قلبي على كل الأسناع=وأزرى يطيعـن بالمـوده يذيعـي
ومن لا يحوشه خاسرٍ لو شرى باع=قسمه يصير من الفواكـه رجيعـي
يا عنق ريمٍ طالع الزول وانصـاع=قنّاصها ياطـا الوهـط والنقيعـي
إلى عطى للدعب راغت مع القـاع=تعطي النـوازي قلبهـا مستليعـي
وإلا طليـعٍ قافـلٍ عقـب مفـزاع=وامضرّيِـه بالكـون رد القطيعـي
ركابهـا بالكـون بتْـعٍ وقـطّـاع=مضراب رمحه تقل مدخال ريعـي
وإلا قنـاةٍ علّقـت عقـب مربـاع=مـا صنِّتَـه قنّايـهـا للمبيـعـي
يا عين حرٍّ طالع الصيـد بالقـاع=إلى حذف من راس رجـمٍ رفيعـي
لعل عينه ما يجي جفنـه أوجـاع=ومسالمٍ عـن كـل شـيٍّ فجيعـي
يا سِيد من حطّ الخواتم بالأصبـاع=جعل النبي الهاشمي لـك شفيعـي
العرض العادي
