إلا وهني اللي سرا بالخلاء قناص= بعدما ضواه الليل بأرض خلاويه
سحب مع طلوع الشمس بالباترول والشاص= جميع الزهاب أمكمله بالميه ميه
يباري الحباري مع جررها مشى قصاص= وطيره يجنبه حر ما حط وكريه
بعد شاف له برقا تتاقي تبي المخلاص= تخاف الهدد وعيونها للنداويه
خطفها بضربة صيرم ما عليها حاص= كفخ حين شافه والمخاليب مثنيه
وإلا وهني من حاف جول وهو بصاص= مريض بوسط الحزم ما فيه ماريه
بحره ونحره وهد طيره على مفراص= وكأنه تعذر فالبواريد مملية
وعيني على فرق الكرك لا قطع متراص= ومرحه في قاع صحايح عصريه
يبي خطة وتكتك فني ووضع خاص= لأجل تكسب الجوله معه بالنهائيه
الأقرع والأكحل حفظ رميه ماهوب إخراص= يبين الشجاعى في ملاقا الشجاعيه
وإلا وهني من جاه فرق القطاء رقاص= مقطى وكدري مع غطاطه وجونيه
على ما رد خالي ومخلي من الأشخاص= يبي بجلده من دون رحمه ومأويه
إلا وهني من طاف بعض الديار وناص= وجاب القميري من فياض شماليه
وباقي الطيور أمدورات ما هيب أرخاص= وناهيك عن طرد الأرانب بغدريه
وصيدِ الخلاء بفتن من الراس للأخماص= ربيع الهواوي في دروب الهواوية
وراع الولع مثل الذي بالبحر غواص= يبي يرمي أحبال الرجا كل صبحيه
أقوله لمن مثلي مولع وفا وإخلاص= حيث أني مجرب من تجاريب خبريه
العرض العادي
