احذر يغرّك

[روح التميمي]

من قصائد عبدالله الزامل النبطية الساخرة :

ياللي تبي طرد الهوى وأنت مطفوق=طرد الهوى يحتاج تدقيق وحساب
طرد الهوى صعبٍ ويبغى له رفوق=إلى ابتليت وصرت للغي طلاب
اسمع وصاة اللي مشى كل طاروق=يكشف لك الخافي ونا عنك قد غاب
احذر يغرّك بعض الأزوال بالسوق=يلبس عباة ويخفي الوجه بحجاب
يغريك لا هارجك في حسن منطوق=وكفوف تلمع كلها نقش وخضاب
والبودرة منهاوضع نصف طابوق=وكْريم مع حمرة على زين الأطياب
يمشي يهز الردف والراس مفهوق=مثل الحمامة والحقيقة هو غراب
صحيح ما قالوا هل العرف والذوق=بعض البشر يلمع وهو نور كذاب