حتى وأنا صاحي من الهم حلّمت!

[روح التميمي]

البارحة ليلي هواجيس وهموم=الناس نامت بس أنا منك مانمت
ليلي قضيته بين سجّات وحلوم=حتى وأنا صاحي من الهم حلّمت!
ملزوم لو صرّحت : مانيب ملزوم=أنت بحنانك يا أريش العين لزّمت
وأنت متردّد بين غامض ومفهوم=أعزم وترخي وإن تراخيت عزّمت
مجهول مراتٍ ومرات معلوم=أقوم وتقعد وإن تقاعدت لك قمت
أجيك مشتاقٍ ويقفي بك الزوم=أصوم وتفطر لي وإلى أفطرت لك صمت
الشك يلعب بك مثل لعبة الدوم=لا سمت .. لا بايعت .. لا جيت .. لا شِمت !
ودّك تقول .. وخايفٍ تكسب اللوم=لانتب سكتت ولا بهمّك تكلمت !
أسقيتني كاسٍ من الهم مسموم=من جور تلميحك وشكّك تسمّمت
تريدني معصوم؟ مانيب معصوم=أكذب عليك إن شفتني لك تعاصمت
لا يا حبيب الروح .. لا تبعد الحوم=في غير جوّك ما خبر يوم حوّمت
أنت القمر والبيض من حولك نجوم=وأنت الوحيد اللي له الروح سلّمت !