يا عاذلين المبتلى عن نويه = قلتوا وكثر القول ما فيه ثابه
هرج على قدر العقول الرديه = ما حسب القايل خطاه وصوابه
راع الهوى له بالموده تحيه = وانشد عن اللي جربه وش لقا به
ياخذ بعزمه لين ركب اردعيه = في ساعة ما يسترنه ثيابه
ينسى هواجيسه وروحه وحيه = مع صفقة الموج المعلي جرا به
يا طول ميدانه ويا عسر شيه = احدٍ عرف مجراه واحدٍ غدابه
يا محرمين الزين ويش الدعيه = وين الحديث اللي ورد عن كتابه
قالوا حرام وقلت والله خطيه = اللي يعد من الحرام السبابه
جنيّه يا عظمها من جنيه = حسبي على من هج للظلم بابه
ناس تغير بمذهب الجاهليه = والدين مثل الليل مع من عدابه
ما ضاع من جوّد طريقة نبيه = صلوا على خير الملا والصحابه
يا عاذلين القلب نفسي أمعيه = يا مرحبا بالزين واللي مشى به
يا مرحبا بالزين والف تحيه = والف تكمل ما نقص من حسابه
لك يالطيف الروح متلف خويه = والزين ما يحظى به اللي شقا به
ياللي تعرف الريم خلي حليه = له بالجوازي من قديم قرابه
يا عود بردي شرع في جريه = ما لمس الخراف ناعم شبابه
في ظل بستان حصونه قويه = بالماقع اللي كل حي يهابه
عليه فلبي حايمات اضميه = ليته نعشني بارد من شرابه
يطفي لهيب مثل حر الشويه = لو حطوا الخبز الفطير استوى به
يالله ياللي عالم بالشكيه = عن حال مجروح يضيع الدوا به
يا عالم بالبينه والخفيه = يا مطفي حر الهوى والتهابه
قالوا وجيع وعلته داخليه = قلت آه مابي غير جالي عذابه
لا صاحب ينفع ولا من دنيه = مالي حذا اللي ما يخيب الرجا به
وصلوا على المختار خير البريه = ما هل براق تنثر سحابه
2007, 02:18 AM
المواضيع المتشابهه
العرض العادي
