قصيدة رثاء وحب في الوالدة رحمها الله وأسكنها فسيح جناته إنه سميع مجيب
(أم مساعد)
يا رب تنزل بالقلوب السكينة = والطف بنا يا رب في كل الاحوال
الموت حق وكلنا عارفينه = يا رب هوّنها على كل منوال
الروح بالمخلوق عنده رهينه = تسترجعه يا رب لو طال ما طال
والغرفه اللي ودعت ساكنينه = لفه سكون يشبه لصمت الاطلال
البيت حزنٍ والشوارع حزينه = والقلب غادي لأسود الهم مدهال
حزنٍ بقلبي ما تضمه مدينه = ولا يطيقه بالزمن صبر رجّال
بفراق وجهٍ كلنا فاقدينه = في عينها غيمه وبالقلب شلال
هاك الحنون اللي فقدنا حنينه = في صدرها روضة وحنا به أطفال
أم الحنان بعطفها مستبينه = همه رضا الاول وهمه رضال التال
أمي شربنا من ينابيع عينه = حتى لطم جالٍ بقلبي على جال
أحلى من الشهد المصفى يدينه = وأندى من الهتان لاهل همال
وأرق من ريحٍ فضح ياسمينه = وأجمل من الذكرى العزيزه على البال
أفنت بدرب الخير زهرة سنينه = وأقفت ينور دربها بيض الاعمال
جاني خبرها بالضحى حاملينه = وكني شربته سم في وسط فنجال
رحت وعطيته قبلة في جبينه = إلين دمعي فوق صدر الكفن سال
ودعتها وأطهر جسد شايلينه = وسيل الدعا ينساب من كل الازوال
برفوق وسط القبر يا دافنينه = هاك الجسد يا ما من آلامها شال
يا ليت كفي دون لبنه وطينه = والكف الاخر يحضنه حب وجلال
يا رب جت لك ثابته في يقينه = إجعل لها يا رب بحماك منزال
في جنة الفردوس مع نازلينه = أنهارها تجري تحت فيّ وظلال
مع النبي ومن تمسك بدينه = أصحابه اللي صدقوا خير مرسال
ويا رب تكرمها بجمعة ضنينه = أبوي هاك الشامخ النايف العال
أدعو لها بالله يا سامعينه = تستاهل أم مساعد بكل الاحوال
والفوز للي بر في والدينه = يحسن لهم والله يجازي بالافعال
2007, 01:00 AM
المواضيع المتشابهه
العرض العادي
