بعد ما طار عني لذيذ الكرى

[ماجدونا]

بعد ما طار عني لذيذ الكرى = وامرح الواش عني وهمي سرا
يوم كثرت همومي وضاق الضمير = السبب ما طرقني ومما جرا
قلت ما قال قبلي طبيب الزمان = يا قلم سر وبلّغ وشف ما ترا
يوم قلّت وفوقي وبار النصيب = والرفيق انكر العرف واستنكرا
كل دار بها لي من اول رفيق = في زمان مضى كنّه السكرا
صدّ عني وانا ما طلبته لزوم = وانكر العرف الاول وردّ البرا
يوم بار النسب والرفيق القريب = بالجفا لابس لي ثياب العرا
قلت يا قلب لو صحت ما لك مجيب = الله الله وهيضت مما طرا
اقبل الفايده يا بعيد المزار = واحتسب للمساري وشرب الصرا
وارتكاب الشدايد وسجّ الركاب = واكتساب المعزّه مع جميع الورا
في بلاد غريبه وجنس غريب = كل ما شفت بالعين مستنكرا
عن مناطحك بالسوق من لا يبيك = لا نطحته غدا الوجه منه اصفرا
غار دمه ودنّق وكفّ الكلام = وان قضت هرجة في قفاك افترا
عند غيضه يبيع الغلا بالرخيص = خيبة المال ما باع به واشترا
ما يثمّن لغيظ العدو والصديق = ايهّن في سلوم الرجال اكبرا
بالمعايا وهزّ المطارق شجاع = في زمانه وجيله ولا عنترا
كل ما ذكر بالوقت هذا يصير = بئس ما خلّف الوقت والمعشرا
صاحب الطيب ما هوب يثنى عليه = ان حضر سفه وان غاب ما يذكرا
والردي من تمعناه يشهر نباه = يفتخر بالقرايه وهو ما قرا
لو يغاب المطوع وهو بالوجود = كان من حشمته حطّ بالمنبرا
لا جزا الله سنين الطرب والسرور = يوم وقت الجهل والشباب اخضرا
وهقتني مع البايرين العفون = دافنين المواجيب تحت الثرا
خادعتني سنيني وانا ما دريت = وابتلاني زماني وهو ما درا
كيف اتهوك بنفسي مع الخاينين = البزازين والبوم والحمّرا
ما تخيرت من باب جنسي شجاع = له قعيد الى طاح ما يعثرا
ذا ويامن تحمّل خفيف السلام = فوق عملية كنّها الجوذرا
عدّ ما هلّ وامطر حقوق السحاب = واكتسى بالورق باخضر واصفرا
مثل زلّ السجاجيد عند التجار = فلّهن صاحب البيع للمشترا
واشتمامه كما الورد والزعفران = وافخر المسك والعود والعنبرا
مثل دانة طليميس عند المبيع = ياهل البطن والذيل والمحشرا
ما تعدد عدوده على من يبيه = ولا تنمّق وصوفه ولا تحصرا
من حشى روح روحي لمثلك رفيق = من سباع المهامه ليوث الشرا
ابن ميه وعشر كمال الحساب = لا تعدي وراها ولا تقصرا
يا ولد علي يا ابو محمد بليت = من زمان مشى لي ومشيه ورا
باختلاف الليالي ومن لي صديق = دبّروا من سنا الوقت يوم ادبرا
عقب هاك الطرابه وضحك الزمان = عضني ناجد الغيظ واستنفرا
واستحيت اخبرك واشكي عليك = جارك الله وعزّك وسيع الذرا
وش ترا لي الى حلّ في المشيب = والشباب انتقص والسواد اغترا
اثر رفقة بعض ناس برق بعيد = يستغرّك على البعد يوم اسفرا
وان تناولت عشبه تعيب عليك = ما تطوله رعاياك يوم اثمرا
لا جزى الله ردى المعرفه بخير = منكر العرف من غير شي جرا
والردي والردا لا تحسّف عليه = مثل خبرك والمنجرح ما برا
ذا وصلوا على سيد المرسلين = بعد ما طار عني لذيذ الكرا