(الاسبوع الشعبي)
يكفيك من طير السَّعَد تَغْرِيده=بالرُّوضه الغَنَّا جنوب الوادي
يصدح بصُوت شاقِني ترديده=نَشْوَةْ هواي ابْفَرحتي واسْعادي
له مَنْجَم المعْنَى ولِه توليده=ومْن الخيال امْظَرَّف بالكادي
هذِي ليالِ ماقطَفْها عيده=ماحَضَّرَوا له باحتفال عادي
يمشي بها الشاعر ويَقْضُب سيده=عينه على المحْدَار والمسْنَادي
يِطْلق لسَانه من مَثاني قِيده=لو هو يراقب شارة العَدَّادي
يختار من وَرْد الربيع او صِيده=شّدِّه هواه ابَخاطرِ منْقَادي
للشعر خَطِّ واضحِ تمهيده=للشاعر الموهُوب فيه اطْرَادي
سِحْر الهوى والفَنّ من تَاكِيده=يَرْضَى به الغاوِي بْحَادي بَادي
ماكل من غنَّا ولَوَّح بِيده=نقُول هذا شاعرٍ نَقَّادي
الشعر حكمِ صادِرِ تَأبِيده=صّدَّق عليه العبقريَّ الغادي
والحكم للجمهور في تَأيِيده=ياعَل حَظَّه يِبْتِسِم بالنَّادي
هذا مجالِ ننتِظِر تمجِيده=بين العقول اومركز الارْصَادي
اسبوعنا الشَّعبي بدا تهديده=ان صار بالمعنى سْبُوعِ هادي
مايقبل اهْمَاله ولاتجميده=في صفحة من وَقْته المعتادي
حِنَّا نرى من واجبه تجديده=بالفكر والاحساس والارشادي
وامْدَاول الفكره نبي تَرْشِيده=وانْصَفِّيَ الواقع من الاحْقَادي
للفن نرفع راسنا وانْجِيده=ولْحِفْظِنا للعهد بالميعادي
بِحْضُور من هم جُوهَرِ في جِيده=في فكرةَ الرسَّام والا الشَّادي
شعَّارِنا تَاج الكمال اتْرِيده=وِضْيُوفِنَا فيهم لسَان ابْلادي
نِلْنا الشَّرف وِبْكِل عام انْزِيده=للشِّعر فيهم مجلس الاسْيَادي
مانترك الفرصه بلا تَسْديده=قدحة شراره من صميم ازْنَادي
الشِّعَر له ناسٍ بلاهم كِيده=واليوم هُم في شعْبِةَ الرُّوَّادي
مافات للجيل الجديد انْعِيده=لو لَمْحةِ تذكر بْشَكْل افْرَادي
هذا ويَلْزَم للخَطَا تَفْنِيده=والحق بالمصْدَار والميرادي
والوقت غالي واحذرُوا تبديده=سِمْعَة عنيزة غايتي وامْرَادي
واسبوعنا الشعبي نبِي تمديده=وقت الفرح هو مِلْحِنا والزَّادي
عنيزه 22/5/1425هـ
العرض الشجري