وهذه هدية أخرى من أبي زياد , يثني فيها على المنتدى الوليد
فله مني نيابة عن الجميع كل الشكر والتقدير
قال أبو زياد:
بسم الله الرحمن الرحيم
موقع شعراء عنيزة موقع جديد ساهم في إطلاله على الوجود شباب وهبوا أنفسهم
لخدمة التراث والشعر العامي خاصة في عنيزه أيضاً فلهم منا ومن جميع
المهتمين بالشعر لهم جزيل الشكر ولهم كل التقدير والاحترام :
موقع شعراء عنيزه
مَوْقِعَ اهْلَ الشِّعر بِعْنِيزِه مِثالي=والفَرَح بِعْنِيزِهَ الفِيحا دِليلِه
هي عِنِيزِه مَوْرِدَ العَذْبَ الزِّلاَلي=من قَرَاحَ الشِّعْر من صَافَ الثِّميلِه
القِصِيدِه ساقَها غالي لْغَالي=من هَوى الدِّيرِه تِمَلَّكْنا الوِسيلِه
ياعِنيزِه لك رِجالٍ ماتْبَالي=بالتَّعَب –تِهْدِيكَ الاَفْكَارَ النِّبِيلِه
أَوَّلَ ابْطَالِك بَنَوا لك مَجْدْ عَالي=وِارْصِدَوا لك بالزِّمَن كَنْزَ الحَصِيلِه
وِاسْتِمَرَّ المَجْد بَايَّامُ وْلَيالي=وَاقِعَ الحاضر وِفَا والله وِكيلِه
من شِبابٍ فيهُمَ الفَخْرِ امْتِوالي=من تِرَاثَ آباؤُهم صارَوا مِثيلِه
ياسَلامَ الله على الفِكْرَ الجَمَالي=وَارِثِه جِيلٍ يِجِي من بَعْد جِيلِه
رَايَةِ عْنِيزِه لهم بَاوَّل وِتَالي=مارَعاها واحِدٍ يَنْفُضْ شِليلِه
ذِي هِيَ العادِه لْـمِيدانَ الكِمَالي=ياشِبَابٍ كِلِّهُم حِيلٍ وْحِيلِه
مِيزِةَ الاَفْكَار مافِيهِ احْتِمالي=النِّجاحَ اليوم مَضْمونٍ سِبيلِه
مَعْدِنٍ صافي على سَلْمَ الرِّجالي=بالأصَاله كِل شَهْمٍ يِنْتِمي لِه
من جِنُوبَ المملكه وِالاَّ الشِّمالي=سِيرِةَ الْـمَوْقِع مِثِل بَرْق المِخِيله
شَاهِدُوا مَوْقِعْ هَلَ الشِّعر الخَيالي=مارِسَتْ بِحْمَاهَ اَلاْفَكارَ البِخيلِه
كِل شاعر مايَبِي عَنْهِ ارْتِحالي=به جَنَاحٍ يَسْكِنِه مَحْدٍ يِزيلِه
لازِمَ اذْكُر بالحقيقِه مابِدَالي=لَلْقِصِيدِه صَفْحِةٍ ماهِي قِليلِه
يَسْلَم اللِّي فِكْرِتِه تَفْتَح مِجالي=للبِعيدُ وْللقِريبُ وْللقِبيلِه
يَنْشدُون العَالَمِيِّه بِاحْتِفالي=أَمَّنَوا مِشْوارُهُم دُونَ الفِشيلِه
ماتَوَارَوْا في مِتَاهاتَ الرِّيَالي=الهَدَف وَاحِدْ –عْنِيزِه والفِضيلِه
وِاقْبُلُوا عِذْرِي كِتَبْتَ اللِّي بْبَالي=مانِسُوقَ الشِّعر بَافْكَارٍ هَزيلِه
مَوْقِعَ اهْلَ الشِّعر بِعْنِيزِه مِثَالي=والفَرَح بِعْنِيزِةَ الفِيحا دِليلِه
عبدالرحمن بن عبدالله الهقاص (ابوزياد)
عنيزه 14/4/1428هــ
العرض الشجري