لو كان تنساني فلا نيب ناسيك

[روح التميمي]

لو كان تنساني فلا نيب ناسيك

يا صاحبي غير زمانك مشاهيك=منتب على وصلي وشوفي شفاوي
بانت على مقرن حجاجك مواريك=الله واكبر يا عيون النداوي
عقب الوفا واللي مضى من لياليك=رمت الجفا ما ذيب سيرة هواوي
إن كان عني موشوي السوّ مغريك=هيسٍ على باب النمامة ضْراوي
فأنا الذي ما دمت حيٍّ فأبرجيك=رجى مخيل البرق مظمي شواوي
في يوم شوبٍ والموارد مضانيك=والعود مصرم والورق منه ذاوي
والله متى ما حل ذكرك وطاريك=يزوي ضميري ياأتلع الجيد زاوي
يا ما عنيت إلى تنحّت مفاليك=أسري وحيدٍ مع فجوجٍ خلاوي
لو كان تنساني فلا نيب ناسيك=ما دام عيني ماه ما غار هاوي