طاب الكرى والكيف
وله في كون البكيرية عام 1322هـ يرد على حمود العبيد الرشيد:
طاب الكرى والكيف والجفن لي بات=واستر بالي واعتدل كل مايل
من يوم ربعي كد شفوا لي غليلات=دينٍ قديمٍ بالسنين الأوايل
وخلاف ذا يا راكب له معفّاة=عمليّةٍ تسبق جميع القبايل
تلفي حمود وخبّره بالملاقاة=راحت عليكم يابوماجد دبايل
جيتوا ابغاةٍ معتدينٍ بدولات=تبغون ملْك ديارنا والحلايل
وحنا نطحناكم برب السموات=رب الملا معطي العطايا الجزايل
جيتوا وجيناكم على الهجن عجلات=ينخنّنا الخفرات شقر الجدايل
يومٍ جرى من بيننا دون إبانات=مثل البرد به من حَقُوق المخايل
براقه الشبلي وحد الرهيفات=من دم ربعك جانب الحزم سايل
عبدالعزيز اللي براسه لجاجات=ما حصّل إلا الذل هو والفشايل
خذنا الذخاير والمهار العريبات=مع الحلل والطرش زودٍ نفايل
وجمعٍ دحمنا به على الخد مثرات=أهفى مقامه وأيتم أولاد حايل
ولا بد ما نرجع عليكم بردات=البيض تنخانا على كل طايل
تبغى القضا عما مضى من مسافات=القطع والتجمير ما له دلايل
جينا الوعد يا حمود ما به مراواة=في هدّةٍ تجلى جميع الغلايل
خذنا القضا بديوننا اللي قديمات=خذنا السمين ولا نريد الهزايل
خمسميةٍ والشيخ زودٍ مثارات=الخد من ربعك به الدم سايل
عند الصباح بحايلٍ توحي الأصوات=من ايمان ربعي طلقن الحلايل
لا تحسب إن الله بعيد المحافاة=يمهل ولا يهمل جزيل الفضايل
تقرا الكتاب ولا تهاب المضلات=وميزانكم دايم عن الحق مايل
شفنا خطوطك بالوصايا القبيحات=عودٍ كبيرٍ والجهل بك هوايل
هذا لنا وقتٍ بحربٍ وشطات=وسيف الفنا يقصب بكم والسلايل
عيّنت عجلانٍ ويتليه جمعات=لحقه مناصيبٍ وناس وقبايل
وابن الصويّغ مع حسين وذوات=وفهيد هو وعبيد طعم السلايل
وماجد نعته أمه دهاها مفاجاة=تلعي بعال الصوت في كل طايل
وقيّض على النبقي رجومٍ مقيمات=ياخذ ثلاث سنين سبعه يشايل
سرنا على هجنٍ مع الدو عجلات=تبري لها شحص المهار الأصايل
فوقه مطاليقٍ عيالٍ ونشات=كن الشهر به ديدحان المسايل
نتلي لأبو تركي فعوله قديمات=وهو الذي حظه على كل طايل
ياما فجا من حلة في عزوبات=وطير السعد يبرى لشيخ القبايل
وصرنا عليهم نايفٍ مثل إبانات=جاك الخبر ما هوب رد الرسايل
جمعٍ لكم دسناه في خمس ساعات=السيف يصرخ والدخن له ظلايل
أخذنا بيارقكم وأخذنا الشفيفات=والحمد للخالق وسيع الفضايل
دون المحارم والغروس الظليلات=ياما لطمنا دونهن كل عايل
ما ايزك بلدانك وخفت العقوبات=قبل الذهاب وفشركم بالفشايل
وديارنا بالله عليكم بعيدات=ياما رجع عنهن صنوف القبايل
وعلى النبي صليت في كل الأوقات=عد الرمل وعد نبت المسايل
تبلغ نبي الله حبيب البريات=شفيعنا يوم الحشر والهوايل
المصدر / شعراء عنيزة الشعبيون 98/3
العرض المتطور
