على اسْتِحْياء مَدْرِي فيك خِيفه

[حمد البادي]

على اسْتِحْياء مَدْرِي فيك خِيفه=وِشْ مْكَتِّف أياديـك النظيفـه
مدامِكْ واثق الخطـوه تِقَـدّم=أو اِرْجع . لاتْوَقِّف بالنصيفـه
أنا مابيـك مهـزوزٍ تْخَايِـر=مابيـن الاندفاعـه والنكيفـه
أبيك بْكِل مـا أوتيـت قـوه=تِجِي لِك هيلمان وْلِك وِحيفـه
أبيك اتْجين راسك فوق عالي=كما روس الشخانيب المنيفـه
بِصدرٍ يآسع الدنيـا رحابـه=ورمشٍ يِعْجب اعيوني رفيفـه
وخطواتٍ تَمَخْطَر في تباهـي=وجسمٍ بانهصـاره وتْعَطِيِفـه
وْخَلّي كل من ضاق ايتضايق=يَضِيق بضيقته ويموت جِيفه
وقولي من ؟ يضايقك ويعيقك=وانا اوريك وشلون أستِضِيفه
لَخَلّيه إيتمنى المـوت منـوه=ويدْفَعْ فيه الاثمـان الكليفـه
ألا لايقربـن أحـد حـدودي=فإن حدوديا الأرض المُخِيفـه
إذا حاربت جائـع دون قوتـه=تساوى الموت مع لقمة رغيفه
تركت الكون كله لاجل عِينِـكْ=ما رُوِّضْ من مهاره والعسيفه
عشقتك وانت كفـوٍ للعشاقـه=ولالـك لاحلـيّ وْلا وِصِيِفـه
فمن حقي عليك اتشوف هـذا=بِعَين إجلال وِبْنَظْره حَصِيفـه