[حمد البادي]

حي الكلام اللي من الروح للـروح=وعاه عقلـي وِسْمعنّـه اسموعـي

مجمّلٍ بالـورد وازهـاره اتفـوح=ساعـة قريتـه غالبنّـي ادموعـي

يامرحبا ماهي تصافيـح ومـزوح=لا والله إلا من منابـت اضلوعـي

ياصاحبي مادونـك اليـوم منـدوح=أَسْكَنْتْ من ظني وهدّيـت روعـي

إسْتَفْتْ قلبك خافي الوجـد والبـوح=تلقى لِكْ أكثر ِمنْهْ من كـل نوعـي

يفدى مقامك كل صاقـط وسلتـوح=ياعالي اجذور النسـب والفروعـي

على رِجِلْ باب المعاليـق مفتـوح=إدخل بِنَعْلَيْنـك وقصّـه اشلوعـي

اخوك الاصغر سامحه وانت مسموح=مابين الاخوه حـرب ولا فزوعـي

يمكن إسائة فهـم يامبعـد الشـوح=عتب أخـوّه بالزمـان القطوعـي

ويمكن تلاطيشٍ بعيـدات ولمـوح=اللمـح ذبـح ويستثيـر البتوعـي

ويمكن ويمكن بعض ماخطّ باللـوح=زاد الورم والجرح جامع وموعـي

خلاصة إن كل الذي فات مدمـوح=صافي لبن من مبهلات الضروعـي