[روح التميمي]

شارع الغالي .. الا عزّمت امرّه=القى قلبي قد سبقني .. يحتريني


من عقب صدّه غدا بالقلب حرّه=من حواجز حطّها بينه.. وبيني

والاكيد.. انه لقى عاذل.. وغرّه=بكلامٍ.. او مكيدة.. مبتليني

يجرح احساسي.. واسامح كل مرّه=انا.. مدري.. كيف اقبل ما يجيني


اسال الله جالي همي والمضرّه=هو وكيلي.. شايفٍ ما صار فيني

كيف اوصّل له عتابي واتشرّه=وكيف ازيل.. هجوس حيرة .. تعتريني

يا الهي.. دعوتي لك مستمرّه=ما .. ابي .. غيره وليفٍ يهتويني

شفت انا منه السعادة.. والمسرّه=وذكرياتٍ عذبةٍ..احيت حنيني


صورته فيذا.. وفي هذا .. مقرّه=تاج راسي..واقسم انه.. هو يميني


الغلا.. له.. ما نقص مثقال ذرّه=والذي نفسي بيدّه.. محتويني