سر يا قلم واستخبر القلب ينبيك = واصحى تزيغ بدارج الراي حذراك
يا قلب لا تبدي حوادث بلاويك = الا لمن هو يحفظ السد وياك
تبدي من احداث الدهر من شكاويك = كن الدهر بك ناصب حبل الاشراك
لا تستريب ان شفت ضيق المساليك = كم واحدٍ قبلك توطاه ما جاك
اصبر ودولاب الدهر له مفاكيك = كم فرج المولى لمثلك وشرواك
يا قلب لا تنسى حبيبٍ مصافيك = متمسكٍ بحبال لامه ولاماك
ما زل يومٍ ما تحرا حراويك = الا ولك بالطوع يطلب مهاواك
واحذر تقاصي واحدٍ ما يقاصيك = واسمح خطا من كان يسمح خطاياك
هذي وصوف الحب يا قلب تنبيك = وتحذرك عن قرب هذا وهذاك
واتبع هوى من هو يتابع مهاويك = الى صفا فـ ورّه نوايا صفاياك
ما دام قلبه لك على الود هاويك = ومصافي ما بان لك منه جفواك
لا تجعله مثل الذي ما يدانيك = وتسبب الفرقا وتكشف إمّغطاك
لازم على الخل الذي في مماشيك = يمشي ولو حالت به اقدار الافلاك
هذي علاماته ولا فيه تشكيك = والشاهد الواضح الى من تنصاك
يبدي سلامه حين شافك يحييك = ترحيب مشتاق لشوفك ورؤياك
ادعج غنج حط العذارا مماليك = والى سطى بسيوف الالحاظ فتاك
فتح زهر ورد الخدود المداليك = والى تبسم واضح الدرّ باداك
محلاه الى اقبل في تمدريه يغريك = يشبه قضيب البان او ناعم الراك
زين البها في عشرة الحب يرضيك = عذب النبا سهلٍ جنابه وضحاك
عز الله انه بالمهمات يشفيك = عند اللقا ومسامر الحب يهناك
بالله يا قلب الخطا من يداويك = عقبه من الخفرات ويزيل بلواك
يا قلب عقبه لو ترى البيض تاليك = محدٍ يِعيضك فيه لا ذا ولا ذاك
هذا عديل الروح هذا يعاطيك = كاس المحبه وينتحي عن دناياك
هذا الذي له منزلٍ في خوافيك = داخل حشا الروح العزيزه تولاك
هذا نديم الغي هذا يناجيك = بالسر والسر الخفي ما تعداك
هذا يدور عشرتك ما يشانيك = هذا الذي له رغبة في ملاماك
هذا الحبيب بصافي الود يسقيك = كاس يزيل مدوخل الهم بحشاك
هذا على ما تشتهي دوم يعطيك = حسب المطوعه ما يخالف نواياك
متمسكٍ بعراك ما منه تفكيك = راغب ومغرى فيك ماطاع لسواك
الزم حبالك لا تبين مساويك = غض النظر عن عابرات تعداك
هذا هو المقبل وغيره يراويك = وجه النفاق ومقفي عن ملاماك
قل للعذول اقصر وقهقر خطاويك = ما سمع كلامك لو تكلمت يا ذاك
عندي على هذا شهود تكافيك = الموت بالطرف الحور حين يلقاك
ومجدل مثل العرابيد يغريك = والشاهد الثالث على الدرب خلاك
يا زين لا تصغي لمن هو حكى فيك = ومعذبه سلطان جهره بنجواك
الله يديم أنسك ويكمت امعاديك = ويزيد بالبلوى لمن هو تبلاك
واسلم وطالع سعدك اضحى يباريك = من فوق سبع عاليات تعلاك
* * *
كرخانة الهوى
عن الدار دارتني رحى البين بثفالي = ولأقدار دارتني عن الشمل بشمالي
تناءت بنا النيات بالبُعد و النيا = ولاطارشٍ ياتي بعلمٍ عن الغالي
ولا من مخبر يطري سميه من الملا = لعلي افوز بهم ولو مرمروا حالي
ولا من ولو طيفٍ يورّي لناظري = ولا طايفٍ من نسمة الغرب تهيالي
زها لي زماني قدر عشرين حجة = بهن نلت غاياتي وقصدي وآمالي
مضن وانا عنهن بكرخانة الهوى = مسيب مغيب ما يريب النيا بالي
مشيح بطرد الصيد في شمخ البنا = لهاله قصورٍ ربها كل قتالي
بنيًّ عبثهن المريات والمراء = يجرن قلب المشوق جرهن الأذيالي
تحير التغاري والتماري بحسنهن = كما تاجر البلور يحضاه بصقالي
وزن عن هجير القيض في قرقف الفيا = وعن زمهرير البرد ولفحة الصالي
منهن ابليت بعوهجٍ غضة الصبا = تحير النواظر في وصوفه وتهتالي
غضٍ غنوجٍ غض واغضى وغاضني = بقريضة مريضٍ ريض الرضا وزعالي
زريفٍ لطيفٍ لي وليفٍ بلا وفا = يهيف ويعيف ويخلف الولف بجفالي
جليلٍ جميلٍ مستميلٍ من الروى = يهيل ويميل لنسمة الريح ميالي
ملولٍ بونساته تلولٍ يتلني = زعولٍ قتولٍ بل حيولٍ و حيالي
يودني يومٍ و يومٍ يلدني = كما رونق الطاووس يبدي لي اشكالي
إلى وقفت حارت عيوني بوصفها = وإلى دانت خطاها بدا القلب ولوالي
فالى دنقت كتفٍ و ردفٍ يهينها = وساقٍ كما سواقة الموز بظلالي
على الكتف والردفين زلفٍ يحفها = كما ذيل شقرا طقها الذعر مشوالي
لها غرةٍ غرا وعينٍ ومبسم = وصدرٍ صقيل فيه كاسٍ وفنجالي
على مفرع يسبي عزا مستهامها = كما سلبة الفانوس لطفٍ و إشعالي
الا ياشفاتي شفي اشفاك اشفني = ولا يا حياتي لا تكن فيّ محتالي
والا يا نديمي بالصفا ارحم شكيتي = والا يا غريمي بالجفا خف من الوالي
اهايم و ازايم كل هم يهمني = يسل الحشا من شد فرقاك سلالي
انا من جفاك اصلى بنارٍ تملني = وانا من صفاك ان زدتني غير ملالي
انا المبتلى المشتاق و المغرم الذي = رماني غرامك في لسِن كل قوالي
يقولون مجنونٍ خلِيًّ من الذكا = ولا نيب مجنونٍ ولكنني خالي
خلِيًّ من الخلان اقاسي شكيتي = رثيث القوى ما بين شامت وعذالي
خيالك وذكرك والوداد الذي مضى = توازن بي أثلاثٍ و أوزن بحالي
ثلثٍ على الناظر وثلثٍ بي اختفى = وثلثٍ على قلبي كما حبة الخالي
فان كان لا هذا ولا ذا ولا ذي = فلو شربةٍ من صرهد السم تهيالي
أريح بها روحي ونفسٍ شقيه = وكبدٍ تسقى غيظها كدرٍ وزلالي
هذي رسوم الحب يا جاهلٍ بها = في حال ما حايلت عزا وعزالي
فلا والذي زاروا له البيت والصفا = ولا والذي تخضع له الروس ذلالي
فلا اقرا ولا اصلي ولا ارقد ولا اختلي = ولا استاجد الا هم فرقاه يبرى لي
ولا للنما ينوي فؤادي سوى اللما = ولام النيا مع لام خلى بخيالي
غزالٍ غزاني باغتزاله وخزني = وابرم بريم محكم الغزل بغزالي
غزا واغتزا وانا عنه ما ادرك العزا = يالله بحق النور و الطور وأنفالي
ترد لي عصرٍ تقضي برادتي = عسى ما بقى من خابط الوقت يصفى لي
عيني تحب الزين والغي والهوى = وقلبي بميدان الشقى يهجل إهجالي
وترى الموت للعشاق هو غاية المنى = إلى عاد لا وصلٍ ولا القلب بالسالي
ولا بالحياة اظن خيرٍ إلى بقت = عن الدار دارتني رحى البين بثفالي
وصلي الهي كلما ناض بارق = على محمد المختار والصحب والآلي
* * *
لعل عذرا ما براسه نغاميش = و لا تطرب للهوى و الغواني
تعطى الحنيش اللي إلى هش ماهيش = مذروبة النابين صقها الأذانِ
رقطا يشادي لونها ثوب درويش = مسلوبة الاطراف حرشا اللساني
مسلوبة الجنحان طيارة الريش = عميا الافاعي سمها عنفواني
لعل دعبولٍ جداه التفاتيش = بالبيت في حاجات خمص المثاني
شطرٍ بخيلٍ في تدابيره العيش = ظفرٍ وهو عند النشامى هدانِ
يدبق لشيٍ ما لقته المناقيش = كالفارة اللي تجتلد بالمكانِ
عند العشا تلقى عيونه مشاويش = يحّول ياعذراه تلقى الهوانِ
دب الليالي قلبها له تراعيش = تقول صبر والله المستعانِ
يا مال ياهذا وسيع المحانيش = عجل ندبها قال من له ثمانِ
تمرش ملاوي مشة اللب تمريش = عن الغبا يظهر لها بالبيانِ
والا رتع بشواه بعض الجواهيش = صافي الحديد مصقلٍ هندواني
والا فرمحٍ مزرجٍ له تراهيش = عطب الصواب اسمر سواة الشطانِ
يرمى طريحٍ في وجيه المداعيش = بالكون له قصاف الارواح داني
فان كان لا هذا ولا ذا ولا ذيش = فرتب حطبهم تودعه بهلوانِ
الفم يغدن كل غرّ المباهيش = والخد يغر به عريب المجاني
هذا هواي وكل عينٍ تراعيش = تشوف عنى غير شوف العيانِ
باغي الهوى له به لحافٍ وتفريش = وباغي الهدى المعتني به معانِ
دع ذا وادع له يزّنا بالمراهيش = متتابعٍ يسقي دعوث المغاني
دارٍ ربن برباه سمر العكاريش = الخردات العين نجل الاعيانِ
دشيت معهن جوف بحر التباليش = يوم التصافي وابتسام الزمانِ
غصنا بحورٍ بالهوى مالنا قيش = لهن عندي سد مغلق عماني
كم لليلةٍ نحيي رجاها مداهيش = كني خطيبٍ بينهن ترجمانِ
واليوم ما بقى الدهر وصلهن ليش = إلا عنودٍ دار شانه لشاني
تبوسني بالوصل من غير تطريش = إلا بشاراتٍ تزيل إمتحاني
كم عللتني ثم علت معاطيش = وارد حشاي وعاش خلٍ سقاني
حديثها يروي ظمى القلب ويعيش = مثل الشهد يبرى عزا المغرماني
فان لجلجت للمعتني بالمراميش = وكم أهلكت وأحيت بسر و بيانِ
واليوم بان من اشرف الزين توحيش = يوم استحق الود مني جفاني
غير الموانس و النبا منه مابيش = وعل الظمى من سلسلٍ نقرحاني
وتل فرع فوق ردفه كما الريش = وتقطيف رمانٍ بغضٍ ليانِ
طرد النظر برقٍ تعدا على ويش = برقٍ خدر ما ينثني بالتماني
أرجي صفا لاماه رجوى هل الجيش = لمشاهد الكعبة و ركن اليماني
ياسيدي هجرك لنا با لجفا ليش = ودك براني بالهوى وارتماني
تخض لي ماء عقلةٍ ما بها ليش = الا الجفا يا صاحبي وإمتحاني
ان كان من حسنى جميلك تمنيش = فمطل الوعد يمحى جزيل الاحساني
بي منك نابٍ ينهش القلب تنهيش = سهمٍ لجا بين الضلوع المحاني
بين البرايا كني مذهبٍ لي ش = إلى قيل وش بك قلت سحر عماني
قالوا بك الداء الباطني قلت ما بيش = داي الخفي ودواي غر الثماني
ان زرتني رزيت بند الشوابيش = وان برت بي يازين همك براني
واسلم ودم يا صاحبي في هنا عيش = رغمٍ على أنف العدو المهانِ
وصلى الذي خلقه برزقه معاويش = على الذي نزل عليه القرآنٍ
* * *
ناح الحمام و فجع القلب بغناه = طربٍ وانا جفني عن النوم ذاير
وعيني تصدع طرفها واندفق ماه = من شوفها صرف النيا والعزاير
وجسمي نحيل مادري ويش بلواه = يسله السلال سر و جهاير
من هجر غطروفٍ تغطرف بممشاه = عينه وجيده من خشوف الزباير
كنيت ادور في مرابيه مرماه = وده وصوبني بسو الحساير
حسب الغرض توه على زمة اصباه = حكمه على طلابة الغي جاير
اقبل مكيس كن غرة محياه = بدر الدجى السيار وان جاك ساير
يشهر سكاكين المنايا بيمناه = على ثمر قلبي حدادٍ شطاير
يزها لمشتاقه بحليه وحلياه = بالكف تقنين الهوى والعباير
حُسن التبهكل ينعش القلب رؤياه = إلى كشف عن حاجبيه الحذاير
ينسف على نابي الردايف امغذاه = أشقر دليقٍ زاهيٍ للحداير
يفز نيم القلب لا سمع طرياه = وان سار بخدور الرقيات زاير
قلت السلام وعز بارق ثناياه = واقفيت واقفى مادري ويش صاير
عذلت قلب المغرم الدرك يصحاه = واقول خلك عن ما صافاك ناير
ويقول قلب المغرم الدرك ويلاه = ما اقوى العزا من شايتينٍ احضاير
الموت والا الوصل هو داه و دواه = يا جابر أجبرني ترى القلب حاير
يا سيدي يا قدوة العين و قداه = دامت لك أيام السعد والسفاير
أشقيتني يا متلف الروح بالله = زر لا تكن فيمن وليت جاير
أنعش ظمى مستهلكٍ جاك بدلاه = خل العيا وانقذ عمى البصاير
عديم رايٍ جور حكمك تبلاه = ثنيت له منع القوى و الوساير
خِلّى طريح وخيل بلواك تاطاه = والوصل للمكسور خير الجباير
صدك لحالي يا اشرف الزين يبراه = بري الغشيم بشامسات النجاير
إرحم عسى يرحمك ربي بحسناه = العمر خيره للفنا و الوداير
واظن وصل الشوق يرفا خطاياه = لا عاد ما يهوى لكم بالثباير
ذنبي صغير و أول الإسلام يمحاه = يمحى الصغاير باجتناب الكباير
و اكبر ذنوب العبد قتله معنّاه = يموت دركٍ و النقد بالذخاير
والعمر لو هو ناعم العود فاتلاه = للدود في عمق الثرى والحفاير
ياليت مابي له من الوجد يبلاه = بلواه لي فالله مدير الدواير
وطرد الهوى ما كل حيٍ بيقواه = سُمّه بلاجي مُهجة الروح ساير
راعيه مثل امهايمٍ داه برداه = لو كنّ رمس النطق واخفى السراير
ينبيك عن خافي كنينه سجاياه = وكثر اعتزال الناس في كل عاير
ولا كل طرادٍ يزينه ويزهاه = واحسن معانيه أجتناب القصاير
دع ذا ويا من ريف قلبي ومشكاه = يا خزن سدى عن خباث السراير
قلبي بميدان الهوى عمست ارياه = وجروح علاتي لجن بالضماير
شف لي طبيبٍ شاطرٍ في مدواه = او طير وكرٍ من فروخ الجزاير
حُسن الطبايع كل من جاه بشهاه = دالوب سردالٍ قوي البهاير
ظرفٍ يديرعقول الالباب بحكاه = لاهل الهوى بمواصل الصلح شاير
لاحل شبكه خضب الكف وادماه = من خرداتٍ بالمنازل عذاير
يلقى خليلي و اربع من دناياه = يلعبن له لعب الفلى البراير
مرباه قصرٍ عالىٍ طال مبناه = إلى من نواه الدرك دلا يخاير
ما يدرك المحتال حيلة ملاواه = لو هو على كف الجناحين طاير
والله لولا خوفتي تشمت اعداه = واخاف يومٍ فيه تبلى السراير
لا حب ركن الدار واطاف مسعاه = واحرم واشاهد له واحل الوزاير
واطلب عسى يصخر خليلي بلاماه = ويريح قلبي عن لهيب السعاير
إلى صفا لي قلت أنا الحمد لله = وحييت واصبح لي هوى الكيف داير
والعب بزمار الطرب واشرف الواه = وارز رايات الفرح والبشاير
لك يا بعد حيي وميتي بلا ماه = وحجاب سترٍ دايمٍ لك مساير
* * *
توانوا قدر ما تنثر العين واكف = من الموق هطالٍ على الخد همالِ
بتذكار محبوبٍ على ذكره الحشا = خليعٍ من الراحات ومن العزا خالي
صفا العيش به دهرٍ طويل وسرني = زها تسعة احوالٍ بعد تسعة احوالِ
ليالٍ زهت عندي بغايات مطلبي = وانا ما اغبط كسرى ولا قيصر التالي
وانا ارفل بثوب الغي في لذت الهوى = جديد يدق القاع تطرخ به اذبالي
لكني بلذاتي على عاية الهوى = ملكت الهوى يوم الهوى لي بالآمالي
ولا فاتني من لذة الغي طربه = بالاسعاد يوم الوقت والحظ باقبالِ
تقضت ولا كني بها نلت وصلها = ولاكنني مزيت من مبسم حالي
نعى البوم من عقب البلابيل بالضحى = نواعي فريدٍ حال من دونها جالِ
تذكر و ذكرني بها طيب الوفا = ضحوك اللمى وافاه قصاف الآجالِ
عليه الف حلٍ يرحمه والي السما = ويسمح عن اللي فات في عصر الاجهالِ
تقضى وخلاها على الغيظ والرضى = كما خلى الاول يلحق الاول التالي
ولا عاضني فيها من البيض مثلها = صفا الود ماقلبه عن الود منحالِ
إلا يا حمامٍ ناح في راس ما نبا = بلالحان مطربني على النايف العالي
ترنم هداك واطرب وغن لي = ولا تنتحي يالورق على منزل الغالي
مباني قصورٍ حلها كلما زها = من البيض ماعنها غريم الهوى سالي
ربى الزين فيها ما حدٍ نال زينه = بالاوصاف عندي ما حدٍ نال ما نالِ
مرابي مرابي الزين والغي والهوى = مغاني العذارى اليوم سقيت بالإكمال
زهاهن مجمولٍ من البيض عندك = حسين المعاني زاهيٍ كل الافعال
رحيبٍ إلى وفي شفيقٍ إلى وفي = ولا بالجفا ينوي ولا يقطع اوصالي
إلى نال وصف الريم مثله من الملا = عنودٍ فلا هي له لدىًّ بالأمثال
تحير النواظر في مراعاة وصفها = ولا ينتهي واصف معانية لو قالِ
يزينه معاني زين طبعه من الوفا = لك الله ماني قايلٍ زور ومحالِ
جليلٍ جلا عن مهجة الروح مابها = من الغل واكدار تزايد بولوالِ
جميلٍ يسر العين زاهي جمالها = على مفرعه يبدي لي الوان واشكالِ
لها غرةٍ فيها كما الصبح لا بدا = شعاع يشع ابنور محمود الاقبالِ
إلى تل شقرٍ كالعرابيد وانتثر = على مهجة العشاق يقضي ويهتالِ
ضحوك عجيب الدل عجاب إلى حكى = نديم الهوى ياتي على كل منوالِ
زريفٍ وليفٍ يحفظ العهد والوفا = لطيفٍ عديم الجنس في كل الاحوالِ
على ذا فلا يبغى لك الله شاهد = دليل المعاني به الى قال فعالِ
صدوقٍ عزيز النفس في كل حاله = بشوش ولا عنده من الغش مثقالِ
غطاني صفا وده وأرخص بما غلى = ولا ينكر الممدوح مدات الاجزالِ
تنوع بتصريف الموده ولا سها = ولا قط يومٍ بالجفا غث لي بالي
الى فاه من فاهه حكايا طرايف = تلذ استماعي له ويجلي لما هالِ
جلا عن ضميري هم فقدان غيرها = بتذكار إنساته وتذكار ما زالِ
يزيل العنا عن من عنا له عنا = جليسٍ أنيس الروح ما هوب ملالِ
ليالي سعودي ساعدتني ولي أتت = على غيظ حاسد مع وشاةٍ وعذال
وانا احمد إله العرش ما ذر شارق = واصلي على المختار والصحب والآل
* * *
يالله يا كافي جميع المهمات = ياقاضي الحاجات لابن القضاةِ
انت الولي سيد الموالي وسادات = وانت الذي حلمك على كل الكايناتِ
ترد لي عصر الشباب الذي فات = عصر الطرب وملاعب الغاوياتِ
وقت الفرح وممازحي للخوندات = واظن ما قد فات ما عاد ياتي
اخوض في بحر الملاهي بسجات = واليوم ذا سن الثلاثين فاتِ
ياشيخ يا للي للمشقين ملات = طالع كتابي ما شفون الرواتِ
يسمح لك السامح جزيل الخطيات = لاتكترب تطمغ بقلبي شباتِ
لاعاد عيني في هوى البيض مغرات = طرد الهوى وش به من العايباتِ
عين الرضى في نقل الاسناد دورات = تلقاه حواش الهرج الوشاتِ
يا راكبٍ مرمال دوً معنات = مردات من عيرات ومعملاتِ
خُمص الأباطي عينها تقل مسقات = زم الوروك وسلفها وارداتِ
عشرين شبر من المعذر لوازات = فخذينها وخفوفها موسعاتِ
مستاسعه من كل شئٍ معذات = سوى الآذان اشخاصٍ ومقولماتِ
الى نعس شيطانها وقت راحات = تقول هرشٍ في مسيره وناتِ
ولها الى مست لها البطن فزات = مثل الخريش ان صعصعوه الشراتِ
تدني البعيد وبالبلق تخرت اخرات = فريد فرق الربد و الاقطاتِ
من التل لطلول الاحسا خمس ليلات = وقل مرحباً بقصوره النايفاتي
بلغ سلامي حيهم والذي مات = أهل النفايل في جميع الصفاتِ
من غير تخصيص وسرها منصات = خذ باليمين اقصد هل الطايلاتِ
عزوة منيِع و آل ملحم تحيات = ومن عقب ذا قل وين غاية مناتي
محمد ومن له يوم الاقفاي عادات = هدات ليثٍ في وجيه العِداتِ
غيث المحول مظوفرٍ بالحميات = درع الرفيق و هيكل المحصناتِ
شوق الطموح وفي نهار المثارات = عوق الطفوح ولو بوجهه راماتِ
قل يا عزيز الجار سهل المروات = بي من معاسيل العذارى هواتِ
إلى بغيت الوصل منهن بدورات = ملن قلبي مثل مل الشواتِ
فلا صفا صافي صفاهن بلذات = فلا بهن ذاتٍ ولا حِسن ذاتِ
اسقنني كاسات راحٍ براحات = ومرة يساقني بكاس المماتِ
الوافيات بوعدهن بالمهاوات = الغادرات بعهدهن بايقاتِ
العاديات بحسن الاقفاي عجلات = الموجفات من النصف منكفاتِ
اللاكزات الموقفات المغيرات = خيلٍ بميدان الهوى مسرجاتِ
الراميات المدميات المصيبات = بمسلبات الروم و معقلاتِ
عرنين وخدود ونجلٍ غضيات = واشافيٍ يشفن ومفلجاتِ
المطلقات العاطفات اللطيفات = القاطفات ابزيهن الشفاتِ
الباطشات المعطشات المهمات = الهايمات الراميات العواتي
الجاهرات الباهرات المنيفات = النايضات الخرد الرافلاتِ
لطفات الالسن خرداتٍ حسينات = بمزاحهن لي مرمرٍ في حياتي
الساحرات الماهرات المكيدات = في كيدهن لي خلبصن مشكلاتِ
يورن غراتٍ ويعبن غارات = يدهن فجاةٍ وينكفن ذايراتِ
يورن بشاراتٍ ويبدن بشارات = يمشن لي دلعات ومغشياتِ
يسقن مداماتٍ ويلعن ندامات = يلعبن داماتٍ وهن غالباتي
بالأخذ عجلاتٍ وبالعطى ونيات = عجلات الاقفا وبالقبل وانياتِ
الا من كثر الملامات لامات = عن خاطري بلهات يا من يفاتي
هيهات عصرٍ فات معهن هيهات = ساعات طربات الوعد به ثباتِ
وشيمات مع شمات وردٍ شميمات = وفيهن مماتي لا وزهرة حياتي
اضحى لهن وقت الرضى والمراضات = من خاطري للباد روحي ثباتي
دشيت بحر الغي احسب سلامات = غرٍ ولا ادري ويش الاقدار تاتي
افرح بهباتٍ من الدوق ولمات = وجتني بموجاتٍ تبتت بتاتِ
أكن زفرات والزى بعبرات = واخفي شماتي عن جميع الوشاتِ
أخاف يعلقني شماتٍ لشمات = واصير درس الليل لاهل الشماتِ
الا ما كد فات قل عنه كد مات = زهرٍ زها زل احك بالمقبلاتِ
و وازن دورات الفلك بالمدارات = بالك تصعفق تصطفق كالمراتِ
سلب الرجى مبدي هل العز واللات = عسى وسوف وليس يروي ظماتي
والا فعدوني بدستور الاموات = اظن عقب الياس تدني وفاتي
وصلوا على سيد جميع البريات = ما اهتز نبنوبٍ من الذاريات
* * *
ناح الحمام وبيح القلب مكتوم = ما جن في خافي حشا المستهامِ
ما ادري طرب يالورق او كنت محروم = او بك على فرقا وليفك هيامِ
يا الورق ما يخفى على الله معلوم = لو هو خفيٍ عن جميع الانامِ
يا الورق ما صابتك الايام بسهوم = مثلي ولا انتب مغرمٍ في غرامي
حتى تنوح وترفع الصوت وتهوم = تبدي شكايا مبهمات الفهام
خل النياحه للذي بات مهموم = مثلي يجاوب ساجعات الحمامِ
ولا انت ياورقٍ على راس مزموم = مانحت نوح معقلاتٍ ظوامي
مستانسٍ في بارد الظل وتحوم = وتشهر وتشرف عاليات العدامِ
ما صادفك صرف النيا جاك بكلوم = ولا ذقت ليعات الهوى والمرامِ
أنا كثير النوح يالورق والوم = من لاينوح ويعتني في ملامي
مجروح القلبٍ آه ودواه مبهوم = مخفيه عن نقال سِدً وكامي
حذراك عن من يلتقي قول متهوم = ينشي علومٍ ما نمته النوامي
يا الورق من صابك يلاويك ملزوم = يجفا نظر عينه لذيذ المنامِ
بالله خذ مني مراسيل ورقوم = مختومةٍ في طيها بالسلامِ
عِد النبات وعِد ما خِط مرسوم = وعِداد ماهل المطر من غمامِ
وعِد ما يطلب من الله مظلوم = وعِد ما باولاد حام وسام
بتحيهٍ من صافي الود معدوم = منه الصبر كنه فقيد العمامِ
اهديه بالترحيب للشوق محتوم = ختم الغوالي غاليات ألمسامِ
بالجادل اللي جاد لي منه بسهوم = رد الخبر عني بليا وهامِ
إنه يسل عني على غير موهوم = بيني وبينه ما تهيا ولامِ
يا من هو شفي من شفاه مطعوم = عزاه لي ويلٍ لمثلي دوامِ
سهرٍ يقاسي زود الافكار وهموم = من زود ليعات الغرام العظامِ
من سام جنسٍ للغنادير محتوم = يشريه لو زاد الهوى بالمسامِ
ومن رام منهن الوصل بات محروم = يجفا ولا يبدي ويخفي الكلامِ
خوف الحسود وواشىٍ يبدي علوم = يبدي مساوي خافيات العلامِ
يا واشىٍ بين المحبين بسهوم = هرج ولا خص الحكي بالتهامي
أقصر فهذي دعوة امحال ويشوم = عنها نجيٍ ما بعرضه وخامِ
تمت وصلى الله على المصطفى دوم = أحمد شفيع الخلق طه التهامي
* * *
مالي وبث اشكاي في كل حالِا = أشكي ومثلي للشكيات حمال
يا ما بداجي مبهمات الليالا = طرفي سهيرٍ ما هوى النوم له حال
والقلب يصلى فوق حامي الملالِا = ومن العنا صابه تباريح وهبال
من حُب غظروفٍ حسِين الدلالِا = الجادل اللي حط بالقلب ولوال
ان قلت انا باسلاه هذا محالِا = لا والذي نزّل تبارك والانفال
إنه على ناظري مديم الخيالِا = وانه بقلبي دايم الدوم نزّال
حاش المعنى فيه مثل الهبالِا = من فقد من لولاه ماني بذا الحال
ما زلت في غي الهوى باعتزالِا = عن لوم لوّام وعن عذل عذال
رمت الصبر واقفى التصبر وزالِا = عني وقلّت حيلتي كيف ابا احتال
إن غرد القمري تزايد اهجالا = واجاوب القمري على نايفٍ عال
أو ناض براقٍ سمر باشتعالِا = فالنار في قلبي لها تشعل اشعال
وخلاف هذا يا شبيه الغزالِا = بالجيد والطرف الحور يغزل اغزال
قم واسقني من در صافي زلالِا = من مبسمٍ عذب المراشيف سلسال
يطفي حراراتٍ بقلبي وصالا = يا كود عن قلبي صدا الهم ينجال
يا منتهى غاياتنا بالنوالِا = يا منوة العشاق يا زين الاقبال
يا نافلٍ جيله ابزين وكمالِا = ومكملٍ ما به من الشين مثقال
يازين ياريف القلوب المحالا = يا من لنا به بالتناويل مدخال
إلا إن وعد يخلف والى قال طالِا = والى وعد بالوصل ماهوب فعال
اتوريك نارٍ في خدوده تلالا= من الشعاع وجمرها حبة الخال
محلاه وان زاد الجمال بجمالِا = الى شهر دوماً على القلب ما سال
محلاه لا منه خطر باعتدالِا = مثل القضيب ان نسه الريح ميال
نابي مزابير ردوفٍ ثقالِا = هاضم حشا ما هو كما قيل مكسال
وان قابل المحبوب حلو النبا لا = عذب اللمى حلو النبا طيب الفال
واسرج لخيله ثم شد الحبالِا = الله يكافي شر صولات الاشبال
خيله على حربه تدوس الرجالِا = تلقى مناعير الصبا عنه ذِلال
والى شهر سيف الهوى واعتزالا = اوما على مهجة غريمه بما طال
في معترك حربه بلحظه نبالِا = من قابله وارسل من السهم سلال
ماله بميدان الهوى راس مالِا = يصفط ولا يدري بما حل بالحال
والى صفا واصحب صديق المقالِا = يعطي من الرقعه كما قال من قال
قصدي لماها منوتي راس مالا = منه المواصل ليلةٍ ليلها طال
يبرد لظى قلبٍ بداه اشتعالِا = ويريح بالٍ بالهوى حل به حال
تمت وصلى الله عزيز الجلالِا = على الذي يشفع لنا يوم الاهوال
قال روح التميمي :
تــم ديــوان محمد الصــالح القــاضي
فليس له من القصائد المحفوظة الموثقة سوى تسع فقط
هنا ثمان والتاسعة اوردناها في ترجمته
العرض الشجري