[روح التميمي]

مفجوع ياقلبٍ بدت فيه خله

مفجوع ياقلبٍ بدت فيه خله = مما طرى طار الكرى الجفن جافيه
بكيت لين اجريت من عبرة له = دمعٍ كما زعج الدوالي دواليه
وانتل من صفق المحاجر وهله = موقٍ هطل وبل البكا لج واديه
علمٍ لفا عن سيد روحي لعله = مما بحاله والي العرش يشفيه
جاني وفاجاني خبر علةٍ له = سو الخبر فيمن صبر لامر واليه
فزيت يوم اوحيت بالترف خله = قلت الخبر بالله ذو العرش وش فيه
قالو عليلٍ قلت روحي فداً له = ياليت مابه ينتقل بي وانا افديه
أحييت ميت النوح والوجد كله = وارخصت روحٍ سندت وادي التيه
أنحب وغربت الحيا عن محله = بالويل والولوال هام المهاميه
وعذرت قلبٍ كلما اطريت خله = يعزا له المرعوب ينهش حواشيه
يالله حبل العسر باليسر حله = باشفاك بين الكاف والنون يكفيه
بـ (طه) وفي (يس) وما انزلت كله = حله وبآيات التشافي تشافيه
يامنجي يونس واظلَّه بظله = يامن دعاه ايوب واشفاه تشفيه
يامخرج يوسف من السجن حله = ويامفرج ليعقوب تفرج لغاليه
يانادبي ود الرساله وقل له = والله من ذقت الخبر طحت باكيه
كني صريعٍ دك به الف عله = ومن شاف حالي سال واقسمت ما افشيه
واقسمت ليتي بالمرض في محله = وما حل به يرفع ويوضع بداعيه
يسمح به الجسم المحرق لخله = وتخضع له الروح العزيزه وترضيه
مغرمك مايجي الدهر من هواً له = ولا ينفع القلب المحرق تمانيه
أعذرت واحضرت القلم والسجله = واد الحشا جا مكبر من معاليه
بمزاج زاجٍ ما حلا زين تله = وفريت فكرٍ كالتهامي تقافيه
وانشا غمامه من غرامه وهله = فكرٍ حضر كالدر من راي راويه
واتلفت عمرٍ هم الاحباب سله =ياعين حن القلب قومي بعانيه
نوحي وهلي والبكا ذا محله = على وليفٍ بالتصافي مصافيه
أرخصت للروح العزيزه رضىً له = والله ما انسى مامضى من حسانيه
غروٍ الى منَّه تغطرف بدله = خرت له ارقاب الملوك المداليه
الى تغطرف بالهوى لي هوىً له = دجرٍ كما غصن السفرجل تمدريه
كالبدر يوضي في سنا غرةٍ له = وزاهي اللوالو ناض من بين اشافيه
نورٍ على نورٍ لكن الشفة له = كالحص والمرجان والشهد في فيه
ياسيدي روحي غرامك يسله = وامسى فقيد الروح كافيه مافيه