يقول الخطيب اللي ينومسك لا من قال=حديثٍ صحيح وما بغى رواه واسنادي
انا الشاعر اللي ما كتب سبّة الاهمال=ولا له من التشجيع يا كود نقّادي
اما آن وقتي من عنا الحل والترحال=بعد غيبتي وحروفي تصيح وتنادي
على كثر ما اكلّم على الهاتف الجوّال=ما شفت بمجالسكم ولا شخص نشّادي
تدقّون؟ ولاّ ما تدقّون؟ طيّب فال=على ورث ابوي وصيت خالي تمجّادي
واذا كان بالغيبه؟ تراني عضو فعّال=فعاليّتي تكمن بأسلوبي الهادي
ولكن وللتوضيح لو يقطع الارسال=تظلّ الجبال تحدّر الما على الوادي
بعدْها يابن قاضي سموحه على ايّة حال=لساني فضيحه مير الاشواق بفؤادي
لي شهور احسّ ان الهواجيس لعب عْيال=تبي تقودني للذنب وابليس قوّادي
يقولون يالبادي مزعّلك ولد الخال=وانا اقول ولد الخال ما زعّل البادي
يا ربعي هل الفيحا والاثنين راس المال=لا والله شعر وجهي وشوفتهم مْرادي
ترى ما يضرّ اخواننا غير قيل وقال=لو ابليس بين الناس سرداد مردادي
ما جيت انبش الماضي ولا جيت اقصّ حْبال=احبّ اذكر ان الراي من خاطر حْيادي
ترى عادي الغيبات ويحلّها حلاّل=ولكن زعلهم يا عرب ماهو بْعادي!