ياواسع الجود روحي لاتجازيها=الا بعفوك وغفرانك يباريها
ياواحد سامك سبع بليا عمد=والارض عن موجها بجبال مرسيها
خلقت من كل زوجين وعيشته=بالبحر والجو والأرض بدواحيها
قسمت الارزاق لك حكمة الآهيه= تعطي عبيدك وتعلم سر خافيها
احد له المال تعذيب بعد موته=واحد له الفقر خير له بتاليها
ياصاحب المال دنياك صاحبة خدعة=كم واحد كدرت بالغدرصافيها
من بعد هذا تفهم وانتبه واحذر=لاتفلت ايديك من منشب عراويها
الطاعه اللي فرض رب الملا صنها=خمس الصلاوات بوقاته تصليها
طع سامك العرش في ماقال للطاعة=اوجدك لعبادته واجب توفيها
الحج والصوم والزكاة والعفه=مع طاعه امك وابوك اصحي تخليها
ربوك مضغه يبي يرجون منفوعك=حذري من عقوقهم فالنار تتليها
من مابقالك من الايام احفضها=في طاعه الرب تكسب لذ تاليها
لو هي صفت لك زمان وساعفت بأمرك=لابد يوم كدرها مايساويها
كم واحد ساعفت له واقتفت دربه=تضحك وتكشر ونيبان الغثي فيها
تغتال من هادم اللذات ماتدري =لامن نذير ولا عله تداويها
واختام دنياك يعرونك من ثيابك=ويغسلونك عسي حسناك باقيها
ولفوك في قطعة اقماش علي السنة=وعصابه الراس والرجلين زاويها
قضيت نحبك وشالوك بظهر حدبا=ثمان الاقدام تسمع رجف نعليها
اما تقول اجلوني مانبي ناصل=والا تقول عجلوني لجل داعيها
تاصل الي المقبرة وتوجة القبله=يدعون لك بالعفو من عند واليها
عليك صلو صلاة مابها سجده=وقوف يدعون من يقبل حسانيها
وشالوك للبرزخ وحطولك وسادة=لبن من الطين وتبن داخل فيها
وهلو عليك التراب وغبروا ربعك= واقفوا وخلوك من قاصي ودانيها
لاعم لاخال لااخوان ولاصاحب=الا عملك المقدم في مباديها
يوم به الناس حفيانه وعريانه=وانفوسهم صاعدات في تراقيها
جاء من يناشدك بالدنيا عن أعمالك=ملائكه الرب محصين ثوانيها
كان انت ممن عمل خير بهالدنيا=تفوز بالجنه الخضراء وساقيها
اما سعيد موفق يوم تلقاهم=والا بظنك وظيم من مساويها
هذاك يوم عبوس قمطرير أغبر= تنشف عروقك بعد مشروب حاليها
من بعد هذا تلاقي ماحوى كتابك=اما علي خير او شر بمثانيها
تري المصيبه الي مديت كف الشمال=تلقي بها أعمالك الي كنت ناسيها
واختام هذا كتابك جاك باليمني=واعمال دنياك تصعد بك بعاليها
يالله عسي جنة الفردوس منزالك=وجاضعت حور عين في مناهيها
ماتاكل ا لا لحم طير وهو مشوي =وتشرب شراب طهور بين أشافيها
تلبس لباس الحرير السندس الأخضر =أسباب شكرك علي الدنيا ومافيها
من كل ماتشتهي نفسك يهيالك=يالله وانك تبلغنا معاليها
يارب أسلك تثقلي موازيني=عبدك ضعيف وذا الدنيا طغي فيها
وعدتني بالأجابه قلت اسلني=طالبك عيني جهنم لاتراعيها
حاشا تخيب ظنوني وأنت خالقني =وأعمالي القاصرة رحمتك تمحيها
ذنبي كبير وغيرك ماحدن راحم=لانوختبي ركابي من دواهيها
ومن غيرك ارجي الي غصت بي العبرة=وانتك صدري ولا من حيله أبديها
انا مقيم تحت عفوك وغفرانك=هويتي لااله الا انت تاليها
ان كان تاخذ عبادك كلن بذنبه = ياوين ابروح عن حامي تلظيها
وعدتنا قلت من تاب اغفر ذنوبه=انا الغفور المسامح عن مساويها
وجهت وجهي اليك وماحوى قلبي=ماخاب عبد سجد يرجي حسانيها
واقف علي باب غفرانك ولك داعي =تغفر ذنوبي ونفسي لاتوازيها
وأمي وابويه وكل المسلمين أجمع =الحي والميت واللي في مناشيها
هذا وصلو علي المختار سيدنا =مادار ليل وماشلت ذواريها