((.. من قصائده في باب العتاب..))

(كله على شانكم ماهو على شاني)

عندما فقد الشاعر بصره وسلم امره إلى خالقه جادت قريحته بهذه الابيات التي اوضحت اعتصار قلبه بالالم وشرهه الحاد على ابنائه في هذا الظرف اعتبره مصدر ازعاج له فكانت الابيات بمثابة تذكير لما فعله نحو ابنائه عندما كان نشيطاً مصافاً

ضاقت علي الوسيعه يا نظر عيني=من قل شوفي وانا بالبيت منهاني
اقوم واقعد ولالي من يشاكيني=الا الله ابرك دلالي هن اوبرقاني
فكري تشتت وقلبي راح قسميني=متقاسمينه سلالة صلب وجداني
قسم نصا فزعتي بالعسر والليني=وقسم نحر مسندي زبنى سليماني
بينت لك ماحوى فكري ابيتيني=تملهن زين واصحا لا تناساني
مانيب شره وماجا منك يكفيني=اكمت به اعداي وافرح فيه صدقاني
والله لولا الزمان الشين حاديني=مابديت لك ماخفا ياطير حوراني
كنك بعينك من كتابي تراعيني=وشلون تشيع وانا يابوك جوعاني
فيما مضى محفي اقدام رجليني=كله على شانكم ماهو على شاني
حافظكم الله إلي جاء ما يمشيني=فالله يجازي هل الاحسان باحساني