سلام ياريم ٍ من الحور مجنـاه = الله يردك للقلوب الحزينـه
سلام قلب ٍ ضامه الحب واضناه = عليك مضهود ٍ حياته غبينه
الله من جور ٍ بحبك رضيناه = لرضاك لو روحك علينا ضنينه
راع الهوى ينقاد قلبه من ادناه = يرضى الخطا ما ينتحي عن ضنينه
وين انت ضيقات النوى ما قويناه = مضيوم حبك من بدالك يعينه
وين المروفـه كم عام ٍ رجيناه = ما هوب حق اللي يودك تهينه
ياطول ما عيني لشوفك معنّاه = الله يعين اللي بكت منك عينه
ظيم الهوى ذقته ولا شفت حسناه = اخذت لك زينه وخليت شينه
صديت ما كن العنا منك شلناه = وقلبي يهده كل يوم ٍ حنينه
معطيك حبٍّ ما تفهّمت معناه = قلبك مريح ٍ ما بعد حل حينه
هني من قلبك رضى فيه وادناه = يا سعد عين اللي تحوشك يدينه
وعزي لمن حبك تبلاّه وافناه = كاس الهوى ما صار بينك وبينه
ياليت من يرجي معك يلحق مْنـاه = يدرك مرامـه لو بتالي سنينه
مير الرجاء بك ضايع ٍ ما لقيناه = معذور قلبي لو تبيّح كنينه