الموت لاَرْوَاحَ الأجَاوِيد طاوِي=والوَقْت ماله ذَنْب حِنَّا بَلاوِيه
الله كِتَب ماصار بَامْرٍ سِمَاوِي=حُكْمٍ على كِلَّ الخَلايِق اتْمَاشِيه
حَبايِبٍ رَاحَت والاخْرَى تْرَاوِي=حِتَّى المرَاوَا مالها صِرْفِةٍ فِيه
ياما شِبِعْنَا من عَظِيمَ البلاوِي=ماهو جِزَع يارب والحِزْن نِخْفِيه
عَامٍ ثِقِيل اوعَام كِلِّه مِكَاوِي=والصَّبْر يَمْحَى مامِضَى عند رَاعِيه
الصَّبر يَمْحَى صَفْحِةٍ بالحَراوِي=لكِنْ ثِقِيلَ الحِزْن ماهو حَرَاوِيه
ماهي عَواطِف ساعةٍ للهَواوِي=تِخِصّ قَلْبٍ ماتِلَفَّتْ حوَالِيه
اليوم كِنَّ القلب ماله عَراوِي=يومٍ به العاقِل ذِهِل عن ابْنَاخِيه
خامس وعشرينَ الشَّهَر بالأَهَاوِي=تِنَاوَحَتْ بِبْلاَد نَجْد او بَوادِيه
بِجْمَاد ثاني واَثْقَلَ الهَمّ دَاوِي=بعْنِيزِه الله يِلْهِمَ الصَّبْر ناوِيه
سبعه وعشرينٍ بْحِسْنَ المنَاوِي=في جِمْعِةَ اهْلَ الخِير والشيخ نَاعِيه
قلت الخَبر قالوا به النَّجْم هَاوِي=نَجْمٍ تِلَقَّاه الأَجَل بَامْر وَالِيه
نَجْمَ التُّرَاث امْعَلِّمٍ كل رَاوِي=ذَاكَ المرَبِّي والمعَلِّم بْنَادِيه
للفِكْر والتَّمْيِيز والشِّعْر حاوِي=والعقل وِعْلُومَ الرِّجَاجِيل تِحْيِيه
هذا هوَ البُطْحِي بْفِكْرِه نِدَاوِي=عَرَايِسَ الأَفْكَار دَايِم تْنَادِيه
عبدالرحمن اللِّي على الحق ضَاوِي=الله عنَ العَصْرَ المشَوَّه مْصَفِّيه
ابن ابراهيم بْحَيَاتِه غَنَاوِي=تِغْنِيه نَفْسه عن فْلاَشٍ يلَهِّيه
ماهو على تَلْمِيعَ الاْعَلام هَاوِي=ولاطَرَق بِيبَان شُهْرِه وتَنْوِيه
يَكْفِيه حُبٍّ بالقلُوب امْتِسَاوِي=بالمِنْتِدَى والمِلْتِقَى اليُوم يِغْلِيه
تَبْكي عْنِيزِه ماكِفَتْها العَزاوِي=مَعْ نَجْد وِعْمُومَ الجزِيرِه تْنَاجِيه
الشِّعْر من كُبْرَ المصِيبِه حَيَاوِي=يَبِي منَ اهْلَ الصَّبْر نَاسٍ تْعَزِّيه
صَبْرَ العزِيزِيِّه ورَاه امْتَهَاوِي=حِتَّى تَلامِيذِه بِكَوا عِنْد طَارِيه
والِمْجِتَمع عِقْبُه يِثِيرَ الشِّكَاوِي=والْمَجْلِس اللي كل عَاني يِسَلِّيه
يارب عَبْدِك في جِوَارِك رِجَاوِي=كِلِّه يِقِين اورَاجِيٍ منك تِنْجِيه
إِنْعِم عليه بْعَفْو واَنْتَ المدَاوِي=عن سَيِّتِه حِسْنَى الفِضَايِل تْدَاوِيه
مَعَ النِّبِيِّ لْجَنِّةَ الخُلْد يَاوِي=آمين ياكاتِب ثَوابِك ومِهْدِيه
صلاة رَبِّي مَعْ سَلامِه مْخَاوِي=على نِبِيٍّ كِلِّنَا من حَسَانِيه