حصل بين شاعرنا ابو ماجد ( رحمه الله ) واحد الشعراء سوء فهم وزعل .. ادى ذلك الى عدم تدخل احد بينهم خوفا من العواقب ! .. ولسوء حظ اثنين من شعراء الجوف تدخلا بالموضوع وعاتبوا ابو ماجد وزميله معا . فأرسل ابو ماجد لهم طلبا للتفاهم وايضاح الموقف فرفضا الاجابه . فما كان من الزلزال ابو ماجد الا ان كتب القصيدة التاليه وهي تعبر عن نفسها :-

سر يا قلم واكتب جوابي وانا اشوف = قدام لا يمشون طرقية الجوف
خل المثل واضح ومبهم ومكشوف = احرص وفند رد الامثال تفنيد
عبر ودبر واستخص الاسامي = ما دام مخطر رد الامثال حامي
وانا من العادة مسيس كلامي = هرج يوقد لهبة البحث توقيد
قلته وانا احاسب رفيقي على الفور = ولا تحمل ربع حرف من الزور
وانا على هاذي وذوليك مجبور = ولا الخزى ماهوب للمستحي عيد
انا خطاي يحول دونه صوابي = من خلقة الله لي دقاق احسابي
ولا تعرض مسلم في جوابي = ولا بليت ابثور عرضته الحيد
واللي مكذبني يراجع فنوني = يشوف ردي يوم اخلص ديوني
مابي جزا واعط الجزا من عيوني = ان كان ما ركدت الاسباب تركيد
والله فلا سبيت طايل وقاصر = ولا حصل مني على الناس قاصر
لاشك وش ذا من ردي فهم ناصر = اللي يحسبه صاد فخه وهو صيد
بالله ياللي في لزمك الرساله = تراك عني نايب بالوكاله
عرض على ناصر وقل وش غداله = يوم ايتوطى ساقتي بالهرابيد
ما ضاع له من بين الاثنين حصه = ولا من الدارين شيء يخصه
يبي يدخل بالسواليف عصه = لاشك لو يقبل عمرما قبل زيد
انا على هالسالفه منك ممنون = غسلت قلبي عن ريامك بصابون
والصلح عقب اللي جرى منك مدفون = لابد ما اورجك يابن بليهد
يوم احمد الناصر تقل فل عزمك = يخاف حزام الدعاوي يحزمك
وانا ترا في مركزي يوم اعزمك = ابيه بيع اجمال ماهوب تفريد
وراك يومنك بمكة اقبالي = ما شرت لي عن ما مضى من خمالي
حتى اني احاسبك عن راس مالي = يوم انت تاعدني وتهفى المواعيد
والله لولا شيمتي للسدارى = حيث انهم يستاهلون المدارى
اني لابين لك طريق المثارى = ماهوب هاللي جاك فتشه وتمهيد
الله حشمك بحشمة اهل الحشيمه = اللي لهم في كل الاطراف قيمه
والا انت ما تسوى نعال قديمه = هذا جزاك وجود العلم تجويد
بورك بي قدمتها المرباعين = اللي سنامك من اغذاهم ذراعين
ما تفلح الا بالردى والدباعين = وذي عليك اثبات من غير تشهيد
لو انت تدري وش ورا النقص والزود = ما دخلت راسك بين طارد ومطرود
مثل الطفيلي لو لقا الباب مردود = درعم ولا حسب احساب المناقيد
وامنيف ما يلام لا صار شايب = اللي تذكر فيه عوج الطلايب
لولاي من رب السموات هايب = اني لاحط بكل عضو امنه قيد
نشدت عنه وقيل لي شين قيمه = خفيف روز وثقل وزنه بدمه
ومن الصلب جاب الطوافه بكمه = يشهد عليه اشهاب واحمود ورشيد
وش انت ذابح يا ردي المقاضيب = يا معدن الشكه ويا مركز العيب
والله لولا شيمة الكبر والشيب = اني لاقودك قود عبد مع السيد
لو انت مجبور عليها عذرناك = اربما ان اللي مدهويه دهواك
والان انا بمشي معك مثل ممشاك = لا دام انجح منك كل المقاصيد
تراي ما دسيت راسي وانا اقول = والعذر لو جانا فلا هوب مقبول
ما دام عندي مدفع الحرب مكيول = جزمت اجدد فايت فات تجديد
الرد فرض ومن ورا الفرض سنه = والموس شاطر ما يبي من يسنه
والمعتدي ماهوب قلبي يحنه = اعطيه مثل اللي بدر منه وازيد
هذا وباختم القصيدة على خير = والحلم ما يعتاز يا منيف تفسير
ما ذا بسب ولا نبيها معايير = اسود عمل والوجه ما عوز تسويد