مشاهدات وسط السوق

دخلت البارحة للسوق أبشري لي قفيز ولي=وبعض أغراض لعيالي تبي من يكثر الحومه
ودخت أبحث عن الموقف قدر ساعة وزود شوي=مشى هذا .. وقف هذا .. والإشارات مزحومه
والى واحد معه خرقة يقول (ستوب,مشكل ني)=صديق انتا يبي موقف , أنا كتير معلومه
وإذا يبغى يغسل كار إنتا فيه فلوس سوي=انا (جلدي ), كتير (كلين ), وهو ما نظف هدومه
وراس المال خرقة خام وصابون وسطل المي=تلخبط به كثير ألوان معروفه ومعدومه
ترجاني وحاول بي وبهذلني , وقلت (اوكي)=وانا سيارتي والله من يومين مخدومه
وخليته على كيفه ورحت أشري حوايج مي=وخالد له مطاليبه ,وست البيت ملزومه
وانا ماشي بهالزحمة غريب لسان وايضا الزي=شماغي طاح وعقالي ضاع وثوبي راحت كمومه
أنا هالحين في دلهي , او اني صرت في بومبي=اشوف اجناس مختلفه لغتها غير مفهومه
رطاين والسن ترطن .. (كي هالي .. تيجا هي)=و(تورا تورا ). مع (أجا ), وبعض حروفه مقطومه
احد بايع واحد شاري , واحد يركض على لاشي=و(كتنا بيسو , إيك و : دو ), مع البايع وللسومه
وهذا ينشد الثاني يريد العرف( كي نام هي)=يهز الراس مستانس مع اللي شاف من قومه
وهذا سايق التكسي بدا(جنجال) .. وكله غي=مع آخر شال له راكب , وهو يتناه من يومه
وهذا باع بقاله على ثاني بوسط الحي=وشرطه للكفيل اتلا الشهر يعطيه مقسومه
حقايق شفتها بالعين ما تعتاز ومضة ضي=واخاف الخافيات اعظم , ومنها العين محرومه
ورحت اضحك ورحت أبكي وفي قلبي شديد الكي=نسيت اللي من اجله جيت ونفسي فيه محتومه