نام المريح وشاقي القلب سهران = عزي لمن جاله عن النوم شاطون
عزي لمن فكره من العام حيران = كني بغبات بها غير مامون
كل معه فكره وانا تقل سكران = ماسمع هروج اللي عليه يهرجون
جان ابن مزعل ينشدن وابن ميمان = قالوا علامك قلت يالربع خلون
قالوا نعينك كان فيك الخلل بان = قلته آه مشكوين مانيب مديون
لا علة تشكى ولا ضيم ديان = ولا حربة فيها ضحى الكون مطعون
ولا نيب انا طيب ولانيب وجعان = ولانيب انا صاحي ولانيب مجنون
بي علة علامها قاضي الشان = ولاحب عنها جملة الناس يدرون
لا حاسدي يدري ولا اريد عوان = ما دامكم يا حضرة الربع توحون
ان كان فيكم عونة لي وبرهان = تجملوا بي ساعة لا ترحون
مقدار ما يزهب من القيل ما هان = اكتب وانقلكم كلامي وتمشون
سلام احلى من لبن عفر المتان = والذ من شربيت سكر وليمون
وافخر من العنبر معه خلط ريحان = يهدى لمن عرضه عن الهرج مصيون
الصاحب اللي ولع القلب واشقان = خلاني اسهر والخلايق ينامون
لولاه ما غنيت زينات الالحان = ولا سهرت وبان ما كان مخزون
ولا غدى جسمي من الحال عريان = ولا بقيت بسجن الاشفاي مسجون
اشفى عليه الصبح وايّس مسيان = بين الرجا والياس ظليت مغبون
يا مستغشين السراير والاضغان = عسى الى اوحيتوا جوابي تعذرون
ان الهوى غلاب راعيه تلفان = مهما تكون الحال مانيب ممنون
انا الغريم المغرم اللي من آوان = لو سارت الرجلين فالقلب مرهون
الله يدير الي الهوا مثل ما كان = حيثه هو الرحمن ومصرف الكون
وخلاف ذا صلوا على نسل عدنان = ما ثار بارود وما سل مسنون
محمد وآل البيت ما بت سهران = عزي لمن جاله عن النوم شاطون