الصبر محمود العواقب فعاله=والعقل أشرف ما تحلت به الحال
والصمت به سرٍّ سعد من يناله=والهذر به شرٍّ وشومٍ وغربال
وأشر آفات الفتى البخل بماله=وأشر منه المطل في كل ما قال
ولا خير باللي ما يصدّق مقاله=فعلٍ بحالاتٍ قصيرات وطوال
فالبلّ معلومٍ بالأيدي عقاله=والخيل تزلج بالشبيلي والأقفال
والرجل بالواجب لسانه عقاله=لا قال علمٍٍ تم لو حال به حال
والمال كثره عار إلا بحاله=فضلٍ ومعروفٍ إلى نال ما نال
ومن جاد جدّه صار ضده نعاله=ومن ساءت أخلاقه فراقه هو الغال
ومن لا يفارق موضع الهضم غاله=فالقهر مثل السيف والحيف قتّال
ومن هاش حاش المرجلة والشكاله=ومن ذَل ذِل ومن حال يقتال
ومن جاد ساد ومن يشح بحلاله=ما أدرك مرام ولا صعد مصعد عال
والفقر هدّامٍ براسه صعاله=والجود من ماجوده إن ثار بعقال
ولا يفتخر من جاد جده وخاله=هي بالهمم لا بالرمم مثل من قال
فالجمر يمسي كالخلاص اشتعاله=ويصبح رمادٍ خامدٍ مغبرٍ بال
ومن قالب الدنيا بالأريا لحاله=أخطا وأصاب وله دليل بالأقوال
كم خيّرٍ ما نال منها سؤاله=وكم ثور هورٍ ساعفت له بالاقبال
فالسبع رزقه من جيفها ختاله=وجيشٍ ضعيفٍ مرغدٍ رزقه أشكال
ومن كرر إفكاره بالأشيا بدا له=ضغاينٍ تكشف خفيّات الأحوال
فإن جلّ رجلٍ في عيونك فماله=وأوزنْ ثقل عقله بعقلك بمثقال
وتكشف ضغاين غايته بالرساله=أو لفظ مرساله بعنوان ما قال
ويبين لك فضل الرجال بمجاله=إن جا جدال فيه فضّ للإشكال
فالصاحب الصافي تِحِمِّل خماله=يلزمك وإلا الضد حِدّه على الجال
واصحا ترى طرد المقفِّي عذاله=يتعبك والمقبل عطه وجه وإقبال
ترى بوجه اللي يودك دلاله=وضده بمن تكره تراهن بالإغزال
واحفظ وصح وصاة أمين الرساله=لا تغضب أو تجزع إلى حل بك حال
من ضاق ما أدرك مرامه محاله=والبصر قبل يريّع الفكر لك تال
فالدهر له حال اكترابٍ وحاله=يِنفكّ منه العسر باليسر ينجال
كم ضيقةٍ ينفكّ مشكل مجاله=بلطفٍ مْنُه ما عاد يخطر على البال
إن رمت رايٍ فاستخر ثم واله=واعزم وزمّ واجزم على الحال بالحال
كم فات راع الهون عليا يناله=وكم حصّل العليا غشومٍ بالاجزال
إلى صدر بالراي والشور قاله=ما طاع ذلالٍ برايه وعذّال
ومن يفشي أسراره وقع بالجهاله=عطا العدو زمام عقله وهو عال
فالسد له خلٍّ وثيقٍ صفا له=نقّاض مفتولٍ بالاريا وفتّال
إلى احتجت راي فرّ فكر بحاله=يخاطب عواقب كل أمرٍ بالاجمال
يبصرك بأشيا مشكلات صحا له=يوريك ما صوّر على صفحة البال
واشك الحوال لمن تحول بحواله=يسعدك ويبصّرك ويشرح لك البال
هذا وكل من ادّعى بالشكاله=عمّج وتاه بمظلم الليل باللال
ومن اغتر بالدنيا فهو من هباله=ما يعتبر بآجال جولات الأجيال
لصولات دولاتٍ عصاةٍ مضى له=ملْكٍ وحطّتهم تواريخ وأمثال
ذهْبوا وذِهْب المال من له وماله=والحمد هو والمجد يبقى إلى التال
والعمر فيّ زايلٍ لا محاله=وبالحشر ينشر من عمل وزن خردال
فالله توّابٍ منيبٍ يساله=عفوه إلى نشر الصحايف والأعمال
إلى جا غريم الروح باغي زواله=زفّوه عجْلٍ لين جوا به على جال
قبرٍ يشوف الهول به والهواله=مِتْفرّدٍ في موحشٍ مظلمٍ خال
طالبك روحٍ لا عليها ولا له=يغفر خطا ما فات ياغافر الزال
وصلوا على المختار والصحب وآله=ما التجّ حجاج بهاذيك الأميال

ابن جبيل .. وشاكر المشيقح

شكرا لكما على الحضور والتعليق

تقبلا تحياتي