النظرة العشرين

هلا بالنظر العشرين هلا بمصافح عيونك = هلا وإن ما عطيتك شوف ابد لا تزعل أهدابك
هلا جيتك نظر خاطف ياليتك تنشد جفونك = على من سلهمت لحظة حضوري صار .. بغيابك
هلا شفت المسافه صمت تاقف دوني ودونك = سرقت من الوجيه الهرج وصوتي ما وصل بابك
تظلل بالهدب عنهم حبيبي لا يشوفونك = فرح فيك الخفوق اللي فرح لو قال وش جابك
معي يا سيدي لو فتشوا ما ظن يلقونك = أكيد أن الضلوع اللي تضمك نالت اعجابك
أحب اسكن معك هاجس واحب ارحل مع شجونك = واحب ارتاح في همٍ يعذبني من اسبابك
واحب اسهر إلى صبحٍ سرق في طلعته. . لونك = واحب انثر نجومٍٍ ليلها ما ضايق احبابك
هلا بالنظر العشرين هلا ناظرني بهونك = هلا قل للنظر لارحت عنده نوخ ركابك