يا راكبين اكوار خضع المقاديم = خلوا مطاليع الزواهر مقاديم
لعيون من همّه يعمل المقاديم = غرو ملك دولاب قلبي وفرّه
المترف اللي بعّد الرمس عني = والى حضرت او غبت ما سأل عني
والى نطحني مره صد عني = كنه مع المرّه وقلبي مقرّه
مستانس مبسوط ماله مراويح = سقوا سقا داره بوبل المراويح
وانا له اتعب بالسرا والمراويح = واصبحت له بين الوراد ومجرّه
يحمد مصابيح السرا كل سراي = والله عليم في علاني وسراي
وانته تعرف العلم يا دايس الراي = وقت مضى يا زين عذبه ومره
الجادل اللي بين اشافيه ما ورد = القى الى جيته شمطري وماء ورد
والى وردت العد والاه ما ورد = قفر خلا مابه من الرود جرّه
الجادل اللي بين اشافيه ماعود = جيته كما اني قبل ..قبل امس ماعود
القى الى جيته زباد وماعود = الا ان تهيا مثلها في مبره
لو ييتفي لي منه ذوق بنواشي = من ذبّل يشدن ضيق النواشي
كان ارخص البصره وسوق النواشي = ومن القطيف الى حدود المجرّه
الى حصل لي عقب الايّاس قرطوع = طاب المنام وخذت لي منه قرطوع
والصبح اباخذ لي على الرجم قرطوع = راع الهوى ملزوم رجمه يمرّه
افرح الى تمثنيت سوقه = ساقي يسير وشفّ بالي يسوقه
لو ان من صوّب صويب يسوقه = قلت اوصلون ايّاه مابه مغرّه
متبّجح بمشودخات المشاريف = وانا عليه العي بروس المشاريف
وهو على خيله بركب المشاريف = باليوم عشر امرار..ماهيب مره
مانيب اثمّن هون دربه وكوده = الموجب ان مواجهي ما يكوده
والى سفهني مرة قلت كوده = يرجع وما حرّق ضميري يحره
حسبي على من كدره عقب ما كان = لو هامني بذوابة الحرب ما كان
علاّمه اللي عالم كل ما كان = واليوم صدّ وكفّ خيره وشره
حلفت انا لو جار بي فيه ماجور= واصبر وراع الصبر بالذكر ماجور
ويجيره الله يا رضا وانت ماجور = واحفظ كلامي في ضميرك وسره
وصلوا على المختار سيد البريات = عد النفوس المجرمه والبريات
والآل والاصحاب ما قلت من جور = غرو ملك دولاب قلبي وفرّه