الى صدّ الرفيق اللي تودّه=فلا تشفق ترى ماهوب ودّه
ترى مارية المقفي الى اقفى=ترى اسهل ماتعرّض له يرده
ولكنه يجازى مثل فعله=ولو كان اقرب الجدّان جدّه
جزا الاقفاي بالاقفاي مثله=ولا تتبع هواه ولا تردّه

هلا بالخطّ واللي لي يمدّه=سلام ماحصي كثره وعدّه
نعم مضمون ماقلتوا فهمنا=وواجبنا نوافيكم مردّه
انا سايلت عنكم قيل غايب=منعت كتابكم ماهيب صدّه
على نصحي فلا ياجب عتابي=غديت معايد بالمستجدّه
ترى للحلم هو والصبر طوله=ولا ردّ الجمل راسه لبدّه
الى صار الخطا منّا تشيله=عط الجاهل من الابدان قدّه