سلمى تقول: اثر المـودة غرابيـل=وانا على سلمى عليـل الضمايـر
وسلمى تقول: الحب ويل بثر ويـل=وانا حشاي بجايـر الحـب فايـر
وسلمى لها باقصى الضماير مداهيل=وعندي لسلمـى بالمـودة سرايـر
أشفق عليها كـل مايقبـل الليـل=والصبح اوصي يمهـا كـل طايـر
طفلٍ سلب عقلي بنجـل مظاليـل=منها قلوب اهـل المـودة عثايـر
ورموش سودٍ ماتكمل مـن الميـل=سـواه خـلاق البحـر والجزايـر
دار لسلمـى مايجيهـا المراسيـل=دارٍ لقلبـي فـي حماهـا ذخايـر
أطلب لها من رايح النـوٌ بالسيـل=منـه الزبيـدي نابـت بالمحايـر

لـولا الـهـرم والفقر والثالث الموت=يـا الآدمي بـالـكـون يـا عـظـم شانك
سخرت ذرات الهوى تنقل الصـوت=وخـلـيـتـها اطوع من تـحـرك بنـانك
جـمـاد تـكـلمها وهي وسـط تـابـوت=تـاخـذ وتـعـطي ما صـدر مـن بيانك
وعزمت من فوق القمر تبني بيوت=مـن يـقـهـرك لو هو طويــل ٍ زمانك
لولا الثـلاث وشان من قــدّر القوت=نـفـــذت كـل اللـي يــقــوله لـسـانـك

شي بقلبي ياملا حايرن فيه=شي تحير به العقول الفهامي
مخفيه بضميري ولا ودي ابديه=وادور الخيرات شرق وشامي
احترت به ماشفت شي يحاليه=واليوم ابنشد عنه مانيب كامي
سيل جرى مع وادي غير واديه=مادري حلال ماه ولا حرامي
كانه حلال وجايز شرب صافيه=وش حلله يامفسرين الاحلامي
هاتوا تفاصيله وهاتوا معانيه=نبي الدليل اللي عليه الكلامي
نبي دليل يفهم الدرب ماشيه=يمشي به التايه بليل ظلامي
لاشك هجسي يوم خلا مماشيه=انه حرام ومنه زود الاثامي
احرم من الزقوم مره وحاليه=وشربه على الضامي يزيد الهيامي
هذا زمانن كاثرات بلاويه=الغيم يقلب فيه عج وكتامي
وقصر يذلك لاتقابل مبانيه=خله عسى شامخ طويله هدامي
خله عسى ما اصاب اغادير يفنيه=يودع منازله الطويله رجامي
لو زان مدخاله وطالت مبانيه=شيد على الخيبه قليل الرحامي
وحي يوريك المذله وتغليه=ان اشهد انك ميت القلب عامي
ومن لايودك لاتوده وترجيه=ارفع مقامك ياعزيز المقامي
فمن قرب الاجرب بالامراض يعديه=عدواه تسطى باللحم والعظامي

يقول من عدا على راس عالي=رجم طويل يدهله كل قرناس
في راس مرجوم عسير المنالي=تلعب به الارياح مع كل نسناس
في مهمه قفر من الناس خالي=يشتاق له من حس بالقلب هوجاس
قعدت في راسه وحيد لحالي=والقلب في لجات الافكار غطاس
اخذت اعد ايامها والليالي=دنيا تقلب ماعرفنا لها قياس
دنيا تفرق بين غالي وغالي=لو شفت منها ربح ترجع للافلاس
ياما هفا من رجال مدالي=ماكنهم ركبوا على قب الافراس
ولاقلطوهن للكمي الموالي=ولاثار عج الخيلفي كل مرواس
ولارددوا صم الرمك للتوالي=ولاصار فوق ظهورهن قطف الانفاس
في حومة الهيجا لهن اجتوالي =كل يبي من زايد الفعل نوماس
من بينهم سمر القنا والسلالي=مثل البروق برايح الليل الادماس
يقطعك دنيا مالها اول وتالي= لو اضحكت تبكي وتوريك الاتعاس
يابجاد شب النار وادن الدلالي=واكسر لنا يابجاد مايقعد الراس
فنجال يفدا ماتصور ببالي=روابع تضرب به اخماس واسداس
لاخاب ظنك بالرفيق الموالي=مالك مشاريه على نايد الناس
لعل قصر مايجي له ظلالي=ينهار من عالي مبانيه للساس
لاصار ماهو مدهل للرجالي=وملجا لمن هو يشكي الضيم والباس
بحسناك يامنشي حقوق الخيالي=امهلك اجناس وياخالق اجناس
تجعل مقره دارس العهد بالي=حصاح دو خالي مابه اوناس
والبوم في تالي هدامه يلالي=زاك ياقصر الخنا وكر الادناس
متى تربع دارنا والمفالي=تخضر فياض عقب ماهي بيباس
ونشوف فيها الديدحان متوالي=ثل الرعاف بخصر مدقوق الالعاس
ينثر على البيدا سواة الزوالي=شرق حماره شرقة الصبغ بالكاس
وتكبر دفوف معبسات الشمالي=يبني عليهن الشحم مثل الاطعاس