ذكرتك البارح وانا في وسط الحرم =والناس ما لدّت عيوني بازوالها
تكبيرة الإحرام . وابدا مِعْك أنسجم =لين التحيات الأخيره واصحى لها
أسمع صياح اللي تباكى عُرب وعجم =وانا عفى الله عنّ ماني في حالها
عقلي مِعك . والباطِن اللي يَقْدا الجسم =يركع ويسجد بالدميجه وعقالها
والله غفور ويعْلم إني بِك مِلْتِحم= هو خالق الأنفس وعلاّم احوالها
بِعدك فرى قلبي وقلبي دمّ ولحم= ساحت تجاويفه ودمِّه يبرالها
ليتك معي وانا معك مير الله قِسَم =إنك كِذا أولى لِنفسي واولى لها
الرحلة اللي ما نتِ فيها ماله طعم =أثقل عليّ من المدينه وجبالها
إي والله اقوله واقوله واقسم قسم= إنك وزين الروح وانك معدالها
منذ القدم ماهوب توِّك منذ القدم =وانت مْتَوَرِّكها وتلعب بحبالها
ماكان هذا ياحياتي فيك العشم =تزرع لي البسمه وبيدك تغتالها
كيف اطْلب الإنصاف وانتِ خصم وحكم= ماهوب يآوي للقتيله قَتّالها