لو الغضب بالصـدر يصبـر ثوانـي=كان الحسوف المحرقه تسبق الطيـش

ولو العطا ما هـوب بـذل وحسانـي=كان الحيا ماهوب سيـل ورشاريـش

إلى اعتذر كفـي عـن ادنـا خوانـي=متى الوفاء ياهل القلوب الهشاهيـش

إلى جرح ضرسـي طـوارف لسانـي=وين اللحم والـدم والملـح والعيـش

لا صرت ما أحمـل للأخـوّة معانـي=أقابـل الشرهـات والأسئلـة بإيـش

العذر ليش إن كان هـو مـا كفانـي=صدّة أخوي وشمتـة النـذل والديـش

خلوّني أشكر وأعطـي اللـي عطانـي=وآسم كبود اللـي كرمهـم بخاشيـش

إن كان ما أجزي بالمثل مـن جزانـي=حسبت نفسي من حسـاب الدراويـش

وإن كان مـا أمـلا بالفعايـل مكانـي=لبسي لبشتي في المجالس على ويـش

مـا دام قلبـي ثابـت فـي المحانـي=حتى ايش يا ريح العواصيف حتى ايش

البحر مـا حـرك رصيـف الموانـي=والرجل ما يثنيـه طـول المطاريـش

أبأتّكـل دايـم علـى مـن هـدانـي=وأبأنهض حمولي على المتن وأعيـش

وأتـرك دروب مدوريـن الهـوانـي=وأتبع طواريـق العيـال المداغيـش

اللي اليا جـاء الضيـق والامتحانـي=وقفاتهم تروي النفـوس المعاطيـش

دخيلهـم فـي مزبـنٍ مـا يهـانـي=وخوّيهم مـن جـور الأيـام مانيـش